Mu mukino wa Kabiri w’irushanwa rya ‘Basketball The Best Of Rwanda & Burundi’ wahuje intoranywa za shampiyona y’u Rwanda n’ababaye intoranywa za shampiyona y’i Burundi, warangiye iz’u Rwanda zegukanye igikombe hateranyijwe imikino yombi.
Uyu mukino wabaye ku wa Gatandatu tariki ya 9 Ukuboza 2023, wahuje abakinnyi beza mu Rwanda (Best of Rwanda) n’abeza i Burundi (Best of Burundi) wateguwe n’Ikigo ya B&B Sports Agency ishamikiye ku gitangazamakuru cya B&B FM Umwezi ku bufatanye n’amashyirahamwe ya Basketball mu bihugu byombi, ubera muri BK Arena.
Wabanjirijwe n’ibirori bitandukanye birimo abashyushyarugamba babigize umwuga basusurukije abari baje kwihera ijisho uyu mukino, ndetse n’ababyinnyi b’injyana Gakondo mu Bihugu byombi.
Uyu mukino watangiye wegeranye cyane, amakipe yombi agendana mu manota. Agace ka Mbere karangiye u Burundi bwatsinze u Rwanda amanota 16-14.
U Rwanda rwasubiye mu gace ka kabiri rwiminjiriyemo agafu, rutangira gutsinda amanota menshi rubifashijwemo na Ntore Habimana, Muhizi Prince na William Robeyns.
Mu mpera z’aka gace, iyi kipe yakomeje gutsinda amanota menshi cyane yiganjemo atatu ya Ntore na Williams kuko ikinyuranyo cyazamutse kigera muri 13. Igice cya Mbere cyarangiye Ikipe y’u Rwanda yatsinze iy’u Burundi amanota 36-23.
Ikipe y’u Burundi yakomeje kugorwa no guhagarika abakinnyi b’u Rwanda no gutsinda amanota kuko abakinnyi nka Ndikumana Landry na Israel Otobo gutsinda byari byanze.
Ku rundi ruhande, Ntore, Williams na Pitchou Manga batsindiraga u Rwanda amanota menshi, agace ka gatatu karangiye ruyoboye umukino n’amanota 48 kuri 37. Mu gace ka nyuma, u Rwanda rwakomeje gutsinda amanota menshi, ikinyuranyo kigera mu manota 20.
Kuva ubwo umukino watangiye kuba uw’imyiyereko ari na ko n’abafana benshi bari muri BK Arena bafana bikomeye.
- Advertisement -
Umukino warangiye Ikipe y’u Rwanda yatsinze iy’u Burundi amanota 72-43. Abakinnyi b’u Rwanda bihariye ibihembo kuko Ntore Habimana yabaye uwagaragaje ubuhanga kurusha abandi, mu gihe Ndayisaba Dieudonné yahize abandi mu gutsinda amanota atatu.
HABIMANA SADI/UMUSEKE.RW