Biciye mu bufatanye bw’u Rwanda [Visit Rwanda] n’ikipe ya Arsenal yo mu Bwongereza, myugariro wa yo, Jurriën David Norman Timber yageze mu Rwanda anahabwa ikaze n’abakunzi b’iyi kipe mu Rwanda.
Ikipe ya Arsenal isanzwe ifitanye ubufatanye n’Igihugu cy’u Rwanda, biciye muri ‘Visit Rwanda’ igamije kumenyekanisha Igihugu ndetse iyi kipe imyambaro yambara iba yanditseho iri jambo ryamamaza Igihugu.
Ni muri urwo rwego, Igihugu cy’u Rwanda, gikomeje gusurwa n’abakinnyi ndetse n’abigeze gukinira iyi kipe ikunzwe cyane muri shampiyona y’u Bwongereza.
Visit Rwanda ibicishije ku mbuga nkoranyambaga za yo, yatangaje ko myugariro wa Arsenal ukomoka mu Buholande, Jurriën David Norman Timber, yageze mu Rwanda mu rukerera rwo kuri uyu wa Kane. Yazanye n’umukunzi we.
Uyu myugariro ari mu Rwanda guhera uyu munsi, kugeza ku Cyumweru tariki ya 17 Ukuboza 2023.
Biteganyijwe ko ku mugoroba wo kuri uyu wa 14 Ukuboza, ahura n’abana bakina umupira w’amaguru, abafana ndetse n’abanyamakuru kuri Kigali Pelé Stadium.
HABIMANA SADI/UMUSEKE.RW
