Ubuyobozi bw’ikipe ya Kiyovu Sports, bwamaze kugurisha Umurundi wakiniraga iyi kipe, Richard Kilongozi Bazombwa wakinaga mu gice cy’ubusatirizi.
Nyuma yo gusoza umwaka w’imikino yegukanye igikombe cy’Amahoro, ikipe ya Police FC ikomeje kwitegura amarushanwa Nyafurika ari na ko yiyubakira amarushanwa y’imbere mu Gihugu.
Ni muri urwo rwego, yongereye imbaraga mu busatirizi bwa yo, igura Richard Kilongozi Bazombwa wakiniraga ikipe ya Kiyovu Sports.
Amakuru UMUSEKE wamenye, avuga ko uyu mukinnyi ashobora kuba yatanzweho miliyoni 45 Frw kuko yari agifite amasezerano y’umwaka umwe mu Rucaca.
Bivugwa ko iyi kipe yo ku Mumena yafashe miliyoni 35 Frw, umukinnyi agafata miliyoni 10 Frw. Umushahara we ushobora kuzagera muri miliyoni 2 Frw avuye kuri miliyoni 1.1 Frw.
Ubwo yazaga muri iyi kipe yo ku Mumena, yatanzweho agera kuri miliyoni 25 Frw ku masezerano y’imyaka ibiri.
Kilongozi ni umwe mu beza baca ku ruhande muri shampiyona y’u Rwanda, ndetse ni umukinnyi w’ikipe y’Igihugu y’u Burundi.
UMUSEKE.RW