Myugaruro w’Umunyarwanda, Mutsinzi Ange Jimmy yabonye ikipe nshya muri Azerbaijan nyuma yo kugurishwa na FJ Jerv yo muri Norvège yakiniraga.
Kuri wa Mbere, tariki ya 1 Nyakanga 2024 ni bwo Mutsinzi Ange yatangajwe nk’umukinnyi mushya wa Zira FK isanzwe ikina Icyiciro cya Mbere muri Azerbaijan, nyuma yo gushyira umukono ku masezerano y’imyaka itatu.
Iyi kipe Mutsinzi Ange yasinyiye iri mu yakomeye muri iki gihugu kuko umwaka ushize w’imikino yabaye iya kabiri ku rutonde rwa shampiyona n’amanota 58, mu gihe Qarabag yatwaye igikombe n’amanota 83. Zira FK kandi yageze ku mukino wa nyuma w’Igikombe cy’Igihugu, aho yatsindiwe na Qarabag ibitego 2-1.
Iyi kipe bakunda gutazira Kagoma (Qartallar) nta myaka myinshi imaze kuko yashinzwe mu mwaka wa 2014. Ibarizwa mu mujyi wa Zirya kandi ikaba ifite Stade yakira abantu 1,500.
Mutsinzi Ange w’imyaka 26 usanzwe ari mu b’ingenzi mu ikipe y’Igihugu ‘Amavubi’, yakiniraga ikipe ya Jerv yo muri Norvège mu mwaka w’imikino ushize.
Mu yandi makipe yakiniye harimo Trofense yo mu Cyiciro cya Kabiri muri Portugal kuva muri 2021-2023, As Muhanga yakiniye 2015-2016, Rayon Sports yakiniye 2016-2019 ndetse na APR FC yakiniye 2019-2021.
ISHIMWE YARAKOZE SETH KEFA/UMUSEKE.RW