Nyuma yo gukoresha ibihe bito, Umunya-Uganda, Joshua Cheptegei yanikiye bagenzi be barimo Umunyarwanda, Nimubona Yves, aca agahigo kari gafitwe n’Umunya-Éthiopie watwaye umudali wa Zahabu akoresheje ibihe bito mu gusiganwa ku maguru metero ibihumbi 10 mu Mikino Olempike.
Iri rushanwa ryo gusiganwa metero ibihumbi 10 ku maguru, ryabereye muri Stade de France ku mugoroba wo ku wa Gatanu tariki ya 2 Kanama 2024.
Cheptegei waciye agahigo, yakoresheje ikinyuranyo cy’amasegonda 18 ku gahigo kari gafitwe n’Umunya-Éthiopie, Kenenisa Bekele wagashyizeho mu 2008 ubwo iyi mikino yari yabereye i Beijing mu Bushinwa.
Yakoresheje iminota 26, amasegonda 43 n’ibice 14, arusha ibice 30 Umunya-Éthiopie, Aregawi Berihu wabaye uwa kabiri mu gihe ku mwanya wa gatatu hasoreje Umunya-Amerika, Fisher Grant.
Umunyarwanda, Nimubona Yves yabaye uwa 21 mu bakinnyi 24 nyuma yo gukoresha iminota 27 n’amasegonda 54. Bivuze ko yarushijwe n’uwa mbere, umunota umwe, amasegonda 11 n’ibice 14.
Nyuma yo gukuraho agahigo, uyu Munya-Uganda w’imyaka 27 yavuze ko ari intego yari yarihaye ndetse akaba yashimishijwe no kuyigeraho.
Ati “Mu myaka 16 ishize ubwo nabonaga Kenenisa Bekele atsinda i Beijing, ni ikintu cyashinze imizi mu mutima wanjye. Naravuze nti umunsi umwe ngomba kuzaba uwa mbere mu Mikino Olempike.”
Yakomeje agira ati “Sinashobora gusobanura uko ndi kwiyumva. [Gutwara umudali wa Zahabu] nabishatse igihe kinini.”
Yasoje agira inama abakiri bato bakina umukino wo gusiganwa, yo gukora cyane kuko byose bishoboka.
- Advertisement -
Mu 2020 ubwo iyi mikino yaberaga i Tokyo, Cheptegei yakoze iyo bwabaga ngo atware umudali wa Zahabu ariko biranga, aba uwa kabiri yegukana uw’Ifeza.
Nimubona Yves wanikiwe yabaye Umunyarwanda wa gatanu usezerewe muri iyi Mikino Olempike ya 2024 iri kubera i Paris.
Kuri uyu wa Gatandatu tariki 3 Kanama 2024, abandi bakinnyi babiri b’Abanyarwanda barakina.
Guhera saa Tanu, Manizabayo Eric ukina umukino wo gusiganwa ku magare arahatana mu isiganwa ryo mu muhanda ku ntera y’ibilometero 273, mu gihe Umuhoza Uwase Lidwine w’imyaka 25 arahatana mu Koga muri metero 50 mu bizwi nko gukura umusomyo (freestyle).
Ku wa 26 Nyakanga 2024 ni bwo iyi mikino iba rimwe mu myaka ine yatangiye, ikazasozwa ku wa 11 Kanama.
ISHIMWE YARAKOZE SETH KEFA/UMUSEKE.RW
