Charles Bbaale yafashije Rayon Sports gutsinda Mukura VS ibitego 2-1 mu mukino wa gicuti wo kwizihiza imyaka 125 Umujyi wa Nyanza umaze ushinzwe.
Ni umukino wabaye kuri uyu wa Gatandatu, tariki 7 Nzeri 2024, kuri Stade ya Nyanza saa Cyenda.
Umutoza Robertinho utoza Rayon Sports yari yahisemo guserukana Khadime Ndiaye, Serumogo Ally (C), Youssou Diagne, Nshimiyimana Emmanuel ‘Kabange’, Ganijuru Ishimwe Elie, Niyonzima Olivier ‘Seif’, Ishimwe Fiston, Bassane Aziz, Adama Bagayogo, Paul Jesus na Charles Bbale.
Mukura VS yo yari yatangiranye Sebwato Nicholas (C), Rushema Chris, Ishimwe Abdoul, Abdoul Jalilu, Ntarindwa Aimable, Jordan Nzau Dimbumba, Hende Sannu Bonheur, Niyonizeye Fred, Hakizimana Zuberi, Iradukunda Elie Tatou na Agyenin Mensah.
Hakiri kare cyane ku munota wa cyenda, Mukura VS yanyeganyeje inshundura z’izamu ryari ririnzwe na Khadime, binyuze ku gitego cyatsinzwe na Jordan Ndimbumba ku mupira yari ahawe na Hende Sannu Bonheur.
Gikundiro yari iri imbere y’imbaga y’Aba-Rayons bari baje kuyishyigikira ku bwinshi yahise ijya ku gitutu cyo gushaka uko yagombora.
Abasore barimo Adama Bagayogo na Charles Bbaale bagerageje gushaka igitego ku kabiri n’akeza, ariko ab’inyuma ba Mukura bakazibira neza, bajya kuruhuka ari igitego 1-0.
Mu gice cya kabiri, Robertinho yakoze impinduka zihuse yinjizamo abarimo rutahizamu Fall Ngagne wari wambaye umwambaro wa Rayon Sports ku nshuro ya kabiri, mu kurushaho gushaka igitego.
Rayon Sports yari imaze umwanya ica amarenga imbere y’izamu yaje kubona igitego cyo kugombora binyuze kuri Charles Bbaale, kuri penaliti yavuye ku ikosa ryakorewe Aziz Bassane.
- Advertisement -
Umukino urimo ugana ku musozo, Charles Bbaale wari waryohewe no gukinira ku ivuko rya Murera yaje gutsinda igitego cya kabiri, maze umukino urangira Rayon Sports itsinze ibitego 2-1.
Mbere y’uyu mukino, habanje gukinwa umukino wa gicuti wahuje abasheshe akanguhe ba Nyanza City Veteran FC n’Abanyabigwi ba Rayon Sports bazwi nka Inoubliable FC, maze birangira Abanyabigwi batsinze abasheshe akanguhe ibitego 3-2.
Ni ibitego bya Inoubliable FC byatsinzwe na Karuranga Josime, rutahizamu, Andre Lomami mbere y’uko myugariro, Rucogoza Aimable bakunze kwita Mambo ashyiramo igitego cya gatatu.
Mu rwego rwo gusoza icyumweru cyo kwizihiza isabukuru y’imyaka 125 ishize Umujyi wa Nyanza umaze ushinzwe, hateguwe igitaramo kirasoza ibi birori. Byitezwe ko iki gitaramo kiratangira saa Tatu z’ijoro.
ISHIMWE YARAKOZE SETH KEFA/UMUSEKE.RW