Arsenal yatsinze Paris Saint German ibitego 2-0 mu mukino w’Irushanwa rihuze amakipe yabaye aya mbere iwayo i Burayi (UEFA Champions League), mu gihe Borussia Dortmund iheruka ku mukino wa nyuma umwaka ushize yanyagiye Celtic ibitego 7-1.
Umukino wa Arsenal na Paris Saint German ni wo wari ukomeye mu y’umunsi wa kabiri w’iri rushanwa rya UEFA Champions League rivuguruye, yakinwe mu ijoro ryo ku wa Kabiri, tariki ya 1 Ukwakira 2024.
Intsinzi ya The Gunners bayiheshejwe na Kai Havertz watsinze igitego cy’umutwe ku munota wa 20 binyuze ku mupira wari uhinduwe imbere y’izamu na Leandro Trossard ndetse na Bukayo Saka watsinze icya kabiri kuri coup franc, mbere gato yo kujya kuruhuka.
Paris Saint German na yo yagiye igerageza uburyo imbere y’izamu, nk’ubwo Nuno Mendes yagerageje mu gice cya mbere, ndetse n’ubwo Joao Neves yagerageje bakiva kuruhuka umupira ugakubita igiti cy’izamu. Icyakora ntibyahiriye iri kipe yo mu Bufaransa kuko basoje umukino nta gitego babonye.
Yari yo ntsinzi ya mbere kuri Arsenal y’umutoza Mikel Arteta kuko umukino wa mbere muri iri rushanwa ry’abagabo banganyijemo na Atalanta 0-0 mu byumweru bibiri bishize.
Karim Adeyemi yatsinze hat-trick.
Adeyemi yatsindiye Dortmund hat-trick mu gice cya mbere cy’umukino cyarangiye iri imbere n’ibitego 5-1. Emre Can ni we wafunguye amazamu ku gitego yatsinze kuri penaliti n’ubwo cyahise cyishyurwa na Daizen Maeda, mu gihe Karim Adeyemi yahise atangira kubona izamu.
Mbere gato yo kujya kuruhuka, Serhou Guirassy yatsinze kuri penaliti, ndetse ku munota wa 66 ashyiramo icya gatandatu, naho icy’agashinguracumu gitsindwa na Felix Nmecha wagiye mu kibuga asimbuye.
Iyi ni yo ntsinzi iremereye Dortmund ikoze muri Champions League, nyuma y’ibitego 6-0 yatsinze Legia Warsaw mu 2016.
- Advertisement -
Magingo aya, Borussia Dortmund ni yo iyoboye urutonde rw’amakipe 36 ari gukina iri rushanwa kuko ifite amanota atandatu, ikaba inazigamye ibitego byinshi, na cyane ko yatsinze Club Brugge ibitego 3-0 mu mukino wa mbere.
Barcelona na Man City zatsinze!
Nyuma yo gutsindwa na Monaco ibitego 2-1 mu mukino wa mbere , FC Barcelona yanyagiye Young Boys yo mu Busuwisi ibitego 5-0. Iyi kipe y’i Catalonia kandi mu mpera z’icyumweru yari yatsinzwe umukino wa mbere muri La Liga, itsindwa na Osasuna.
Rutahizamu Robert Lewandowski yatsinzemo ibitego bibiri, Raphinha na Inigo Martinez na bo banyeganyeza inshundura, mu gihe igitego cya nyuma cyitsinzwe na Mohamed Ali Camara.
Manchester City iheruka iki gikombe mu 2023, yatsindiye Slovan Bratislava muri Slovaquie ibitego 4-0. Ni ibitego byatsinzwe na Ilkay Gundogan, Phil Foden, Erling Haaland na James McAtee.
Inter Milan yatsindiwe ku mukino wa nyuma na Man City mu myaka ibiri ishize, na yo yatsindiye mu rugo Red Star Belgrade ibitego 4-0.
Hakan Calhanoglu ni we wafunguye amazamu ku gitego yatsinze kuri coup franc, mu gihe Marko Arnautovic, Lautaro Martinez na Mehdi Taremi na bo banyeganyeje inshundura mu gice cya kabiri.
Bayer Leverkusen ibitse Igikombe cya Shampiyona yo mu Budage yatsinze umukino wayo wa kabiri, aho igitego Victor Boniface yatsinze igice cya kabiri kigitangira ari cyo cyatumye batsinda Ac Milan igitego 1-0.
Brest yatunguranye!
Brest yo mu Bufaransa iri gukina Champions League bwa mbere, na yo yatsinze umukino wa kabiri inyagiriye Salzburg muri Autriche ibitego 4-0.
Rutahizamu w’Umunya-Sénégal akaba n’intizanyo ya Brighton, Abdallah Sima wabahesheje intsinzi mu mukino ubanza bakina na Sturm Graz mu byumweru bibiri bishize, yongeye gutsinda ibitego bibiri.
Ibindi bitego bibiri bisigaye byatsinzwe na Mahdi Camara na Mathias Pereira Lage. Ibitego bitatu muri bine, Brest yabitsinze mu minota 10 gusa y’igice cya kabiri.
Mu yindi mikino yabaye, CFB Stuttgart yaguye miswi igitego 1-1 na Sparta Prague, ari na ko byagenze kuri PSC Eindhoven yari yakiriye Sporting Lisbon.
Salzburg, Slovan Bratislava na Young Boys kugeza ubu ni zo za nyuma ku rutonde.
ISHIMWE YARAKOZE SETH KEFA/UMUSEKE.RW