Umuvugizi wungirije wa Guverinoma, Alain Mukuralinda, yatangaje ko ibisasu byaguye ku butaka bw’u Rwanda, birashwe n’ingabo za Congo , byishe abantu icyenda bo mu karere ka Rubavu.
Ni mu mirwano yabaye ku munsi wejo tariki ya 27 Mutarama 2025, ihanganyishije umutwe wa M23 na FARDC.
Umutwe wa M23 umaze gufata umujyi wa Goma, imirwano yarushijeho kuba myinshi ku ruhande rw’umupaka uhuza u Rwanda na Repubulika Iharanira Demokarasi ya Congo.
Umuvugizi wungirije wa Guverinoma,Alain Mukuralinda, mu kiganiro na RBA, yatangje ko amasasu n’ibisasu byaguye ku butaka bw’u Rwanda, byarashwe nkana n’abasirikare ba Congo bituma abantu icyenda abahasiga ubuzima.
Ati “ Hari amasasu n’amabombe yaguye ku butaka bw’u Rwanda, avuye muri repubulika ya Congo kuko imirwano yaberaga ku mupaka. Abantu bashobora kuba batahazi, bumva umupaka bakagira ngo harimo metero 100 cg 300, ahantu hadatuwe, ukabona kugera mu kindi gihugu, oya, harafatanye uretse ko bakubwira ngo aha ni ku mupaka.”
Yakomeje ati “Ibyabaye ejo byagaragara ko bikozwe nkana ndetse hari n’amashusho yafahswe agaragaza ibisasu biturukayo, abandi bakabirasa( RDF). Hari abakomeretse koko ndetse nakubwira ko icyenda bitabye Imana, iyo bataza kumvira ayo mabwiriza byashoboraga kurushaho.”
Umuvugizi wungirije wa Guverinoma avuga ko abantu badakwiye kugira ubwona no gukuka umutima kuko u Rwanda rufite umutekano.
Ati “Ariko abantu bashyire umutima hamwe, umutekano urarinzwe, nta musirikare wo hakurya, yaba uwa FARDC, Wazarendo,wigeze winjira ku mupaka w’u Rwanda,aje arwana.”
Yongeraho ko abarwanyi ba FARDC na Wazarendo baje mu Rwanda, baje kuneza kandi ko ubu bari mu maboko y’ingabo z’u Rwanda.
- Advertisement -
Avuga ko ahanini bitewe n’ibisasu byatewe mu Rwanda biva muri Congo, habayeho kwikanga kw’abaturiye umupaka, ubu abantu 685 babaye bahungiye mu nkambi ya Kijote iri mu Murenge wa Bigogwe, mu karere ka Nyabihu ndetse baza kuganirizwa ku buryo basubira mu byabo.
Amakuru avuga ko kugeza ubu mu Mujyi wa Goma hatari imirwano ikaze gusa hacyumvikana kurasana kw’impande zombi.
Umutwe wa M23 ubu wamaze kugenzura bidasubirwaho ikibuga cy’indege cya Goma .
UMUSEKE.RW
