Nyuma yo gutandukana n’ikipe y’Igihugu ya Cameroun, Rigobert Song wagize ibihe byiza akiri umukinnyi w’ikipe y’Igihugu, yahawe akazi ko gutoza ikipe y’Igihugu ya Centrafrique.
Mu mwaka ushize, ni bwo Song yatandukanye na Les Lions Indomptables, nyuma yo gushinjwa umusaruro nkene muri iyi kipe mu myaka ibiri yari ayimazemo nk’umutoza mukuru.
Rigobert Song uzwi cyane muri ruhago ya Afurika, yamaze kugirwa umutoza mukuru w’ikipe y’Igihugu ya Centrafrique. Yasabwe kuyifasha kubona itike y’Igikombe cya Afurika cya 2027 n’icy’Isi cya 2026.
Ubwo uyu mutoza yari akiri mu kibuga, yakinaga mu gice cy’ubwugarizi. Yakinnye muri shampiyona zikomeye ku Isi zirimo iyo mu Bwongereza muri Liverpool [1999-2000], West Ham United [2000-2002], iyo mu Bufaransa muri Lens ndetse n’iyo mu Budage ubwo yatizwaga muri FC Köln.
UMUSEKE.RW