Misiri: Pyramids FC yatakaje umwanya wa mbere

Nyuma y’igihe iyoboye urutonde rwa shampiyona muri shampiyona y’icyiciro cya mbere y’umupira w’amaguru mu Misiri, Pyramids FC yahabwaga amahirwe yo kwegukana igikombe, yatakaje umwanya wa mbere nyuma yo gutsindwa na National Bank Egypt ibitego 4-2.

Shampiyona y’icyiciro cya mbere y’umupira w’amaguru mu Misiri, igeze ku munsi wa yo wa 22. Gusa inkuru iri muri iyi shampiyona, ni ugutakaza umwanya wa mbere kwa Pyramids FC yahabwaga amahirwe yo kwegukana igikombe cya shampiyona y’uyu mwaka w’imikino 2024-25.

Ni nyuma y’aho iyi kipe iri mu zifite agatubutse mu Misiri, imaze igihe iyoboye urutonde rwa shampiyona ariko intebe ikaba yamaze kuyiha Al Ahly isanzwe ifatwa nk’iyoboye muri iki gihugu.

Pyramids FC ubu irushwa amanota abiri n’iya mbere, yatsinzwe na National Bank Egypt ibitego 4-2, bituma ihita itakaza umwanya wa mbere wafashwe na Al Ahly n’amanota 49 nyuma yo kwitsindira Al Masry ibitego 4-2.

Abasesengura iyi shampiyona ndetse n’umupira wa Afurika muri rusange, bahamya ko bizagorana ko iyi kipe y’ubukombe muri shampiyona ndetse ibitse ibikombe 44 bya shampiyona, yarekura uyu mwanya.

Imikino 17 y’igice cya mbere muri iyi shampiyona, yari yarangiye Pyramids FC ibitse igikombe cya shampiyona 2023-24, ari yo ya mbere n’amanota 42 mu gihe Al Ahly yari ifite amanota 39.

Uko shampiyona yo mu Misiri ikinwa!

Amakipe yose uko ari 18 muri shampiyona, buri imwe ihura n’indi umukino umwe. Bivuze ngo buri imwe ikina imikino 17. Nyuma ya yo, habarwa amanota maze ikipe icyenda za mbere zigahita zishyirwa mu itsinda ry’izihataniye igikombe cya shampiyona.

Izindi ziri mu myanya yo guhera ku 10 kugeza kuri 18, zishyirwa mu rindi tsinda ryo guhatanira imyanya no kutamanuka. Amakipe atatu ya nyuma muri iyi shampiyona, ni yo amanuka hakazamuka andi atatu.

Ikipe ebyiri za mbere muri shampiyona ya Misiri, ahita akatisha itike yo kuzakina imikino Nyafurika y’amakipe yabaye aya mbere iwayo (CAF Champions League) mu gihe iya Gatatu ijya mu mikino Nyafurika y’izeguknaye ibikombe iwazo (CAF Confederation Cup).