Abatuye mu Mujyi wa Ngororero bavuga ko babangamiwe n’umuhanda ujya ku irimbi utageramo imodoka, kuko iyo bagiye gushyingura baterura Isanduku n’amaboko bakarigeza ku irimbi bibagoye.
Umuhanda mubi werekeza ku irimbi rya Gatonzi abo baturage bavuga ko wuzuyemo amabuye y’ibishonyi, unyerera ku buryo abagiye gushyingura ababo bibagora .
Bamwe mu batuye mu Mudugudu wa Nyange, Akagari ka Nyange, Umurenge wa Ngororero bavuga iyo baherekeje ababo bagiye kubashyingura, imodoka zibasiga ku muhanda munini w’ibitaka bagaterura amasanduku arimo imibiri y’ababo bayamanukana bayateruye bakayageza ku irimbi bibagoye.
Ishimwe Evariste umwe muri abo baturage avuga ko nta modoka ishobora kumanuka muri uwo muhanda habe n’itwaye umubiri kuko zose ziparika mu muhanda mugari werekeza kuri Diyosezi ya Shyira mu Karere ka Nyabihu bikaba ngombwa ko abasore baterura isanduku bayerekeza ku irimbi.
Ati”Abagiye gushyingura iyo bageze kuri uwo muhanda ugana ku irimbi biyambaza abasore 10 bakikorera isanduku n’amaboko bakarigeza ku irimbi biyushye icyuya.”
Uwamahoro Agnes avuga ko iki kibazo bakibwiye Inzego z’Ibanze ndetse ko hari bamwe muri bo baba bari kumwe ku itabaro bagategereza ko hari ikigiye gukorwa bagaheha.
Ati”Abaterura isanduku baravunika cyane nubwo kuko kuhamanuka bateruye isanduku bitoroshye kandi iki kibazo kimaze imyaka myinshi kizwi.”
Umuyobozi wungurije Ushinzwe Iterambere ry’Ubukungu mu Karere ka Ngororero Uwihoreye Patrick yabwiye UMUSEKE ko muhanda ugana ku irimbi abaturage bifuza ko ukorwa bawuzi.
Uwihoreye avuga ko bazawukora imirimo yo gukora umuhanda munini ubahuza n’Akarere ka Musanze izaba itangiye kuko uzashyirwamo Kaburimbo.
Ati”Aka gahanda gashamikiye kuri uwo muhanda mugari w’Ibitaka kazakorwa mu Mpera z’uyu mwaka turimo.”
Uwihoreye avuga ko hatazakorwa gusa uwo muhanda munini wambukiranya Akarere imirimo yo kuwukora ikazagera ku mupaka wa Cyanika ibi bizatuma n’ako gahanda kawushamikiyeho kagana ku irimbi gakorwa kubera ko RTDA yawushyize ku Isoko muri Werurwe uyu mwaka wa 2025.
Uyu Muyobozi akavuga ko hazakorwa n’undi muhanda uzashyirwamo Kaburimbo ubahuza n’Akarere ka Rutsiro ahitwa Congo Nil uzaba ufite uburebure bwa Kirometero 50.
Abatuye mu Murenge wa Ngororero bavuga ko iyo uwo muhanda utari kubamo ibishonyi bari kuwukora bakoresheje imiganda ngarukakwezi y’abaturage
Gusa bakavuga ko mu ikorwa ryawo hazitabazwa imashini zisanzwe zikora imihanda yuzuyemo amabuye.
MUHIZI ELISÉE
UMUSEKE.RW/Ngororero
