Uwari umutoza w’ikipe ya Vipers Sports Club, Roberto Oliviera (Robertinho), nyuma yo gutandukana n’iyi kipe, aravugwa muri Simba SC yo muri Tanzania.
Ibi byabaye nyuma yo kugeza Vipers SC mu matsinda y’amarushanwa Nyafurika ahuza amakipe yabaye aya mbere iwayo muri Afurika (CAF Champions League).
Bubicishije ku mbuga nkoranyambaga z’ikipe, ubuyobozi bwa Vipers SC bwemeje amakuru avuga bwamaze gutandukana n’uyu mutoza ukomoka muri Brésil.
Nyuma yo gutandukana n’iyi kipe, Robertinho aravugwa muri Simba SC yo muri Tanzania, ndetse bikaba bivugwa ko mu gihe yakwerekezayo yanajyana n’abungiriza be.
Uyu mutoza mbere yo gutandukana na Rayon Sports, yari yahesheje igikombe cya shampiyona ndetse anayigeza mu matsinda ya CAF Confederation Cup.
Robertinho utazibagirana mu mitima ya benshi mu bakunzi ba Rayon Sports, aherutse kuvugwa muri APR FC ariko ubuyobozi bw’iyi kipe y’Ingabo bubihakanira kure.
UMUSEKE.RW
