Ikipe ya Challengers Cricket Club, yegukanye irushanwa rya Dafabet RCA T20 rifatwa nka Shampiyona muri iki Cyiciro.
Ku wa Gatandatu tariki 13 Gicurasi 2023 kuri Stade Mpuzamahanga ya Cricket ya Gahanga, habereye umukino wa nyuma w’irushanwa Dafabet RCA T20 Men’s Tournament 2023 ifatwa nka Shampiyona muri uyu mukino.
Iri rushanwa ryateguwe n’Ishyirahamwe Nyarwanda ry’Umukino wa Cricket, RCA ifatanyije n’umufatanyabikorwa, Dafabet.
Amakipe atandatu, ni yo yitabiriye iri rushanwa. Ayo makipe ni Challengers, Rights Guard CC, Zonic CC, Kigali CC, Telugu CC na IPRC-Kigali CC.
Umukino wa nyuma wahuje ikipe ya Challengers CC na Telugu Royals CC. Muri uyu mukino Challengers ni yo yatsinze Toss [Gutombora kubanza gukubita udupira cyangwa gutera udupira],maze ihitamo gutangira itera udupira.
Telugu Royals CC yatangiye ikubita udupira [Batting], maze isoza igice cya Mbere ishyizeho amanota 92 muri Overs 17 n’udupira tubiri, ariko Challengers yasohoye abakinnyi bose ba Telugu Royals CC (All out).
Challengers yasabwaga kubona amanota 93 ngo yegukane igikombe, ndetse iibigeraho kuko muri Overs 12 n’udupira dutanu, yari imaze gushyiraho amanota 93 (93 Runs), Telugu yo ikaba yasohoye umukinnyi umwe wa Challengers (1 Wicket).
Challengers yegukanye igikombe, ku kinyuranyo cya Wickets icyenda.
Uko amakipe hakurikiranye:
- Advertisement -
- Challengers CC
- Telugu Royals CC
- IPRC Migali CC
- Rihgt Guards CC
- Zonic CC
- Kigali CC
Uko ibindi bihembo byatanzwe:
- Challengers CC: Yahanwe igikombe n’amafaranga miliyoni 1 Frw
- Telugu Royals CC: Yahembwe ibihumbi 500 Frw
- Best Batter: Obuya Robinson wa Challengers, yahembwe ibihumbi 100 Frw
- Best Bowler: Ramu Moramudi wa Telugu Royals CC, yahembwe ibihumbi 100 Frw
- Top Six Hitter: Obuya Rabinson wa Challengers CC, yahembwe ibihumbi 70 Frw
- Best Fielder: Obuya Rabinson wa Challengers CC, yahembwe ibihumbi 70 Frw
- Umukinnyi mwiza w’irushanwa: PLAYER Roger Mukasa wa Zonoc Telugu Royals CC, yahembwe ibihumbi 200 Frw
Kapiteni wa Challenger CC, Srinath Vardhineni avuga ko icyabafashije kwitwara neza, ari ugushyira hamwe kw’abakinnyi bari bafite ariko kandi banakosoye amakosa bakoreye mu irushanwa ryari ryabanje rya T10.
Umuyobozi Ushinzwe ibikorwa muri RCA, Byiringiro Emmanuel, yishimiye uko iri rushanwa ndetse avuga ko ryagenze neza, akavuga ko aya marushanwa ari kuzamura urwego rw’abakinnyi kuko bari gukina amarushanwa menshi kandi yegeranye.
Uyu muyobozi yakomeje avuga ko iri Shyirahamwe rikomeje gushaka abandi bafatanyabikorwa kugira ngo amarushanwa arusheho kwiyongera.
Nyuma y’isozwa y’iri rushanwa, hahise hatangizwa irushanwa rya Dafabet mu Cyiciro cy’abagore, Dafabet RCA T20 Women’s Tournament 2023.
Mu Cyiciro cya Kabiri na ho, hasozwaga irushanwa rya RCA T20 Tournament 2023. Umukino wa nyuma wahuje ikipe ya Sorwathe CC na Cutch CC, urangira Cutch CC yegukanye igikombe ku kinyuranyo cy’amanota 13.
UMUSEKE.RW
