Umuhanzikazi mu ndirimbo zo kuramya no guhimbaza Imana, Uwase Celine, ari mu bishimo nyuma yo gusoza amasomo muri Kaminuza ya ULK Gisenyi.
Ku wa 01 Nzeri 2023 nibwo Uwase Celine yashyize akadomo ku masomo y’icyiciro cya kabiri cya Kaminuza mu bijyanye n’Icungamari.
Yavuze ko ari amashimwe atabona uko asobanura kubera ibyishimo bisendereye umutima we, ahamya ko Imana yamukoreye ibikomeye.
Yashimye Imana yabanye nawe ikamurinda muri byose, ababyeyi be, abavandimwe bamubaye hafi mu bihe bitoroshye.
Ati ” Ndashimira inshuti zanjye zanyeretse urukundo mu bihe byose, bakaba nanjye. Ndashimira n’abarezi bampaye ubumenyi.”
Uwase yahamije ko agiye gukoresha ubumenyi yakuye mu ishuri kugira ngo buzamugirire akamaro n’Igihugu muri rusange.
Uyu muramyi uzwi mu ndirimbo nka ‘Umugambi’, ‘Igitonyanga’, ‘Inzira’ n’izindi yavuze ko agiye gushyira imbaraga mu bihangano bye kuko yagorwaga gufatanya amasomo n’ubuhanzi.
Ati “Ubwo Imana imfashije nkasoza amasomo, ngiye gukora umuziki neza cyane kandi Imana izamfasha.”
Uwase Celine umaze imyaka ibiri mu muziki asanzwe asengera mu Itorero ry’Abadiventiste b’Umunsi wa Karindwi.
- Advertisement -
Reba hano indirimbo Inzira ya Uwase Celine
NDEKEZI JOHNSON / UMUSEKE.RW
