Ikipe y’umukino w’intoki wa Basketball, APR Basketball, yegukanye igikombe cya shampiyona ya 2023-2024 nyuma yo gutsinda ku manota REG BBC 80-66.
Wari umukino wa Kane wabaye mu ijoro ryo ku wa Gatanu tariki 8 Nzeri 2023, ubera muri BK Arena yari yuzuye abakunzi b’umukino wa Basketball mu Rwanda.
Ni umukino watangiye wegeranye cyane, amakipe yombi agendana mu manota. DeMarcus Holland na Pitchou Manga batsindiraga amakipe yabo, bidatinze agace ka mbere karangiye amakipe yombi anganya amanota 17-17.
REG BBC yatangiye nabi cyane agace ka kabiri kuko mu munota wa mbere yari imaze gukoramo amakosa atatu. Ikipe y’Ingabo yahise iyobora umukino, abakinnyi nka Ntore Habimana, Axel Mpoyo batangira kwinjira mu mukino ari nako batsinda amanota menshi.
Si amakosa gusa kuko iyi kipe ya Sosiyete y’Igihugu Ishinzwe Ingufu yanagorwaga no kuba umukinnyi wayo igenderaho Adonis Filer atari mu mukino nk’ibisanzwe kuko mu duce tubiri twa mbere yatsinzemo amanota atanu gusa.
Igice cya mbere cyarangiye APR BBC yatsinze REG BBC amanota 33-26.
Ikipe y’Ingabo yakomeje gukina neza no mu gace ka gatatu ari na ko Mpoyo yatsindaga amanota menshi muri iyi minota. Mu by’ukuri, REG BBC yakinaga isa nk’iyemeye ko umukino wagiye, cyane ko n’abakinnyi bayo bakomeye yari yabakuyemo.
Mu gace ka nyuma, Mpoyo na Ntore bakomeje gutsinda amanota menshi, ikinyuranyo kiriyongera kigera ku manota 18. Umukino warangiye APR BBC yatsinze REG BBC amanota 80-68 yegukana Igikombe cya Shampiyona yaherukaga mu 2009.
Nyuma y’uyu mukino, hakurikiyeho umuhango wo guhemba amakipe yitwaye neza ndetse n’abakinnyi ku giti cyabo.
- Advertisement -
Muri rusange, APR BBC yegukanye umwanya wa mbere yahawe igikombe giherekejwe na miliyoni 15 Frw yatanzwe n’Ishyirahamwe Nyarwanda rya Basketball (FERWABA) ndetse na miliyoni eshatu ya BetPawa nk’umuterankunga mukuru w’iyi mikino ya “playoffs”.
REG BBC yabaye iya kabiri yahawe miliyoni 10 Frw n’andi miliyoni 3 Frw ya BetPawa, mu gihe Espoir BBC yabaye iya gatatu yahawe miliyoni 6 Frw.
Nshobozwabyosenumukiza Jean Jacques Wilson yabaye umukinnyi mwiza muri iyi Mikino ya Kamarampaka. Turatsinze Olivier wa Espoir BBC yabaye umukinnyi mwiza wa shampiyona isanzwe (Regular season) ndetse anaba uwatsinze amanota menshi muri uyu mwaka.
Kalisa Bryan ukinira IPRC Huye yabaye umukinnyi wazamuye urwego kurusha abandi, Nshizirungu Patrick wa Orion BBC yabaye uwatsinze amanota atatu inshuro nyinshi (53), mu gihe Frank Kamndoh wa UGB BBC yabaye myugariro mwiza nyuma yo gukora “rebound” 269 na “blocks” 59 naho Umutoza wa APR BBC, Mazen Trakh, aba umutoza mwiza w’umwaka.
Ikipe ya APR BBC ni yo izahagararira u Rwanda mu irushanwa ritaha rya Basketball Africa League (BAL 2024).
Rutaremara Seleman/UMUSEKE.RW
