Perezida wa Tanzania, Madamu Samia Suluhu Hassan yakiriye mu biro bye umukinnyi wamenyekanye cyane mu Bwongereza, Didier Drogba amuha inshingano zo kuzaba Ambasaderi wa Tanzania mu mikino y’igikombe cya Africa cya 2027.
Ibiganiro byabo bombi byabereye mu mujyi wa Dodoma, kuri uyu wa Kabiri tariki 05 Gicurasi, 2026.
Mu byo baganiriye, Perezida Samia yasabye Drogba wakiniye ikipe y’igihugu ya Cote d’Ivoire (Ivory Coast) kuzabera Ambasaderi igihugu cya Tanzania mu mikino ya nyuma y’igikombe cya Africa (AFCON) iteganyijwe mu mwaka wa 2027.
Perezida Samia yavuze ko yifuza ko Minisiteri ya Siporo izakora bya hafi na Drogba mu bijyanye no gusangira ubunararibonye mu miyoborere y’amakipe arera abana bato (Sports Academy).
Didier Drogba yashimiye Perezida wa Tanzania Madamu Samia Suluhu Hassan kuri izo nshingano yamuhaye, anagaragaza ko yiteguye gukorana n’ubuyobozi muri Tanzania.
Uretse gukinira Chelsea akamamara n’iyo kipe igakomera, Drogba azwi cyane mu gihugu cye nk’umwe mu bagize uruhare mu guhuza impande zari zishyamiranye akoresheje umupira w’amaguru.
Igikombe cya Africa cyo mu mwaka utaha kizabera muri aka karere kikazakirwa na Kenya, Uganda, na Tanzania bifatanyije kuva tariki 19 Kamena kugera ku ya 17 Nyakanga 2027.
UMUSEKE.RW
