Ruhango: Bashyinguye imibiri 108 y’Abatutsi bazize Jenoside

Ubuyobozi bw’Akarere ka Ruhango, imiryango y’abarokotse Jenoside n’inshuti zabo bashyinguye imibiri 108 y’abatutsi bazize Jenoside muri Mata 1994.

Iyi mibiri 108 y’abatutsi bazize Jenoside yo muri Mata 1994, yiganjemo iy’Abahenda, Abahondogo n’Abakinga yari iruhukiye by’agateganyo mu mva iherereye mu Kagari ka Gitisi, Umurenge wa Bweramana.

Bamwe mu batanze ubuhamya n’abafashe ijambo bavuga ko abenshi muri bo bakuwe aho bari batuye bajya kubicira mu ishyamba rya Pnus riherereye mu Mujyi wa Ruhango, icyo gihe rikaba ryarabarizwaga mu cyahoze ari Komini Tambwe.

Uwanyirigira Chantal watanze ubuhamya avuga ko ivangura abanyeshuri bo mu bwoko bw’Abatutsi icyo gihe bakorerwaga ryacaga amarenga ko hari Jenoside igiye gukurikira, kuko bahagurutswaga hashingiwe ku moko bagacunaguzwa abandi bagakubitwa.

Ati: ”Burugumesitiri wa Komini Tambwe witwa Mugaga Nathan na Depite witwa Kayonde nibo bicishije ababyeyi bacu dushyinguye uyu munsi.”

Uwanyirigira avuga ko uwitwa Murekezi ari we wakuye Se mu rugo amushyira Interahamwe ziramwica.

Uhagarariye IBUKA muri iki gikorwa cyo kwibuka ku nshuro ya 32 Jenoside yakorewe Abatutsi mu 1994, Ndatsikira Evode avuga ko ari ibyago Ruhango yagize kuba Mbonyumutwa Dominique, na Kayibanda bavuka aha kuko bategetse u Rwanda ingengabitekerezo ya Jenoside mu Banyarwanda ari na yo yatumye Jenoside igira ubukana bukomeye kuko yagiye ihererekanywa uko Ubutegetsi bwagiye busimburana.

Ati: ”Iyo habayeho gushyingura abazize Jenoside, bigaragaza ko dusubije icyubahiro n’agaciro abacu bambuwe n’abishi.”

Ndatsikira avuga ko Akarere ka Ruhango kaza ku mwanya wa 3 mu Turere 30 tugize Igihugu dufite imiryango 1000 yazimye yari igizwe n’abantu 5,245.

Depite Nkuranga Egide avuga ko Jenoside yakorewe Abatutsi mu 1994, itatewe n’ihanurwa ry’indege ya Perezida Habyarimana Juvénal nk’uko bamwe mu bahakana bakanapfobya bajya babivuga, ahubwo ko yateguwe ishyirwa mu bikorwa.

Ati: ”Mu Byimana Abatutsi biciwe mu isanteri yaho, abandi babaroha mu cyobo bari baracuye mbere ya Jenoside.”

Abatutsi bamwe baroshywe mu mugezi wa Kiryango, abandi babicira muri iri shyamba.

Guverineri w’Intara y’Amajyepfo, Kayitesi Alice mu ijambo rye yabanje guhumuriza imiryango ifite ababo bagiye gushyingura uyu munsi, avuga ko icyaha cya Jenoside kitagomba kuvangwa n’ibindi byaha.

Ati: ”Twaje guhumuriza imiryango yashyinguye, gusa turababwira ko ari ingaruka z’ubutegetsi bubi, kuvuga aya mateka ni ukuyabwira abatayazi.”

Kayitesi yashimiye abarokotse imbabazi zitagira ikiguzi batanze rimwe na rimwe batazisabwe n’abishi.

Yavuze ko ubumwe bwacu ariyo mahitamo y’Abanyarwanda, yasabye abaturage kwamagana abafite ingengabitekerezo ya Jenoside ndetse ko hari bamwe bayibiba mu bana babo.

Iyi mibiri 108 y’abazize Jenoside yashyinguwe uyu munsi yiyongereye ku yindi mibiri 22 341 isanzwe ishyinguye mu Rwibutso rw’Akarere ka Ruhango.