Minisiteri y’Ubuzima muri Uganda yatangaje ko abantu batatu bashya byemejwe ko banduye Ebola muri iki gihugu, bivuze ko ubwandu bugeze ku bantu batanu.
Aba banduye bashya barimo umukozi w’urwego rw’ubuzima muri Uganda, umushoferi n’umuntu ukomoka muri Congo wavuye mu Ntara ya Ituri, agiye kwivuza muri Uganda.
Ibi bizamuye umubare w’abantu banduye Ebola muri Uganda kuko hari babiri gusa, ndetse umwe yarapfuye.
Dr Tedros Adhanom Ghebreyesus, Umuyobozi Mukuru w’Ishami ry’Umuryango w’Abibumbye rishinzwe kwita ku Buzima ku Isi, OMS/WHO yavuze ko ashima kuba Minisiteri y’Ubuzima ya Uganda ikomeza gushyira imbaraga mu gutahura, gukurikirana no kwita ku bantu biketswe ko banduye Virusi ya Ebola.
Virusi ya Ebola yagaragaye ni iyo mu bwoko bwa Bundibugyo. Dr Tedros avuga ko muri iki gihe gikomeye ari ingenzi ko ubuyobozi buba maso mu kugenzura byagutse ikwirakwira ry’iyi Virus.
Yavuze ko OMS irimo gukorana n’imirya ngo nka Africa CDC, n’abafatanyabikorwa muri Congo na Uganda, kugira ngo babashe gukumira icyorezo, gushyigikira abantu bagizweho ingaruka, no gushikira hamwe igisubizo gikwiye.
Ibihugu bitandukanye byafashe ingamba ku bantu bamaze iminsi 30 bari muri Congo bashaka kubyinjiramo, aho bagomba gushyirwa mu kato iminsi 21 nibura kugira ngo harebwe ko batanduye Ebola mu rwego rwo kurinda ko bayanduza abandi.
Ni na byo birimo kuba ku Ikipe ya Repubulika ya Demokarasi ya Congo iri mu kato mu gihugu cy’Ububiligi.
Ebola ntikanganye nka COVID-19
Ebola ni indwara mbi yica hafi kimwe cya gatatu cy’abo yafashe, kandi kugeza ubu nta muti wo kuyivura uhari. Perezida Yoweri Museveni aherutse kubwira abanyamakuru ko Ebola byoroshye kuyirinda kuruta Covid-19.
Yavuze ko Ebola yandura ari uko umuntu akoze ku wundi muntu wanduye, mu gihe Covid-19 yo yandurira mu mwuka, uhumetse yanduza undi.
Kuri Ebola, Museveni avuga ko bisaba ko hagenzurwa neza abantu bava mu gihugu kimwe baranduye bashaka kujya mu kindi, bakabanza gushyirwa mu kato, kandi abantu bakirinda kwegerana.
Yasabye ko amasoko abera ku mipaka ya Uganda na Congo aba ahagaze muri iki gihe hari icyorezo kubera ko yaha icyuho abantu kuba bahura bakanduzanya.
Yagaragaje ko Uganda nk’uko yitwaye neza mu kwirwanya Covid-19 na Ebola bazayitsinda.
UMUSEKE.RW
