Icyorezo cya Ebola cyo mu bwoko bwa Bundibugyo gikomeje gukaza umurego muri Repubulika Iharanira Demokarasi ya Congo (RDC), aho imibare mishya ya Minisiteri y’Ubuzima igaragaza ko abantu bamaze kwandura barenga 3,400, mu gihe abarenga 1,500 bamaze guhitanwa na cyo.
Nk’uko Minisiteri y’Ubuzima ya RDC yabitangaje, kugeza ku wa 28 Nyakanga 2026, abantu 3,442 ni bo bari bamaze kwandura Ebola, muri bo 1,521 bamaze gupfa.
Isesengura ry’iyi mibare rigaragaza ko mu minsi itatu handura abantu barenga 100, mu gihe impuzandengo y’abapfa buri munsi igera hafi kuri 30, ibintu bigaragaza ko iki cyorezo kigenda gifata intera ikomeye.
Minisiteri ivuga ko Ebola imaze kugaragara mu ntara eshanu zirimo Ituri, Kivu y’Amajyaruguru, Kivu y’Amajyepfo, Haut-Uélé na Tshopo, ikaba imaze kugera mu duce tw’ubuzima 49 kuva yongeye kwaduka hagati muri Gicurasi 2026. Iyi ni inshuro ya 17 Ebola yibasiye RDC.
Intara ya Ituri ni yo ikomeje kuba icyicaro gikuru cy’iki cyorezo, kuko ari ho habarizwa 90% by’abanduye bose. Muri utu duce 36 tw’ubuzima tugize iyi ntara, 28 tumaze kugaragaramo abarwayi ba Ebola.
Inzego z’ubuzima muri RDC zitangaza ko igipimo cy’abahitanwa n’iki cyorezo kiri kuri 44.2%, ndetse zikavuga ko zibasha gukurikirana 78.3% by’abantu bakekwaho kuba baranduye cyangwa bahuye n’abanduye.
Hari impungenge ko iki cyorezo gishobora kuba kimwe mu bikomeye RDC imaze guhura na byo, bitewe n’umuvuduko gikomeje gukwirakwira no kwica abantu. Mu minsi 10 ishize gusa, abantu barenga 500 bamaze guhitanwa na Ebola.
Abashinzwe ubuzima bagaragaza ko umutekano muke mu bice byibasiwe, ubuke bw’abaganga n’ibikoresho byifashishwa mu kuvura no gukumira icyorezo, hamwe n’imyumvire ya bamwe mu baturage, bikomeje kuba imbogamizi zituma ingamba zo kugihashya zitagera ku musaruro witezwe.
Ishami ry’Umuryango w’Abibumbye ryita ku Buzima (OMS) riherutse gutangaza ko ryatangije igeragezwa rya mbere ry’umuti ugamije kurwanya virusi ya Ebola, hagamijwe kureba niba ushobora gufasha mu gukumira ubwoko bwa Bundibugyo, bumaze amezi bwugarije RDC.
MUGIRANEZA THIERRY/ UMUSEKE.RW
