Mu mukino wa mbere wa 1/2 w’imikino ya Kamarampaka muri Basketball uyu mwaka 2026, RSSB Tigers BBC na Patriots BBC, zatangiranye intsinzi zakuye kuri APR BBC na REG BBC.
Iyi mikino ya Kamarampaka, yatangiye ku wa Gatatu, tariki ya 5 Kanama 2026, ibera muri BK Arena.
RSSB Tigers BBC iri mu zihanzwe amaso na benshi nyuma yo kwegukana irushanwa rya Basketball Africa League (BAL) riheruka gusorezwa mu Rwanda, yatangiye uru rugendo neza.
Bitewe n’urwego umukino wariho, agace ka mbere karangiye amakipe yombi anganya amanota 22-22.
Mu gace ka kabiri, Craig Randall w’ikipe y’Ingabo, yatangiye gutsinda amanota azwiho, ikipe ye izamura ikinyuranyo.
Aka gace APR BBC, yagatsinze ku manota 24-21, bituma igice cya mbere kirangira iri imbere n’amanota 46 kuri 43 ya RSSB Tigers.
Ubwo amakipe yari agarutse mu gace ka Gatatu, RSSB Tigers yasubiranye imbaraga, Bey Tarik ayitsindira amanota menshi.
Ubwo aka gace kaganaga ku musozo wako, iyi kipe yari iyoboye umukino n’amanota 66-64.
Aka gace karangiye, RSSB Tigers iyoboye umukino n’amanota 71 kuri 66 ya APR BBC.
Agace ka nyuma, Bey na Zouzoua Mimi batsindiye Tigers amanota menshi, bituma izamura ikinyuranyo kigera mu manota 13 (84-71).
Muri aka gace, ikipe y’Ingabo yakomeje kurushwa mu buryo bugaragara ndetse itakaza umukino itsinzwe amanota 97-82.
Bet Tayler Tarik wa RSSB Tigers BBC, ni we watsinze amanota menshi (35) muri uyu mukino, yanakozemo rebound 11 anatanga imipira itatu yavuyemo andi manota.
Mu mukino wundi wari wabanje, Patriots BBC yatsinze REG BBC amanota 85-74.
Imikino ya Kabiri ya 1/2, biteganyijwe ko izakinwa ku wabanje Gatanu w’iki Cyumweru muri BK Arena.
UMUSEKE.RW
