Fatima Zahra El Mansouri yagizwe Minisitiri w’Intebe wa Maroc, aba umugore wa mbere uhawe izi nshingano muri iki gihugu.
Umwami Mohammed VI ni we wamugize umuyobozi wa Guverinoma, nyuma y’uko ishyaka rye, Authenticity and Modernity Party (PAM), ritsinze amatora y’Abadepite aheruka.
El Mansouri w’imyaka 50 yatoranyijwe aho guha uyu mwanya Fouzi Lekjaa, umwe mu banyapolitiki bakomeye ba PAM akaba n’umuyobozi w’Ishyirahamwe ry’Umupira w’Amaguru muri Maroc.
Itegeko Nshinga rya Maroc riteganya ko Umwami atoranya Minisitiri w’Intebe mu ishyaka ryegukanye imyanya myinshi mu Nteko Ishinga Amategeko.
PAM yegukanye imyanya 97 mu myanya 395 igize Inteko, bityo ikaba izakenera gufatanya n’andi mashyaka kugira ngo ibashe kugira ubwiganze.
El Mansouri asanzwe ari umwe mu bagore bazwi muri politiki ya Maroc. Yabaye Meya wa Marrakesh, ndetse aba Minisitiri ushinzwe imiturire n’imitunganyirize y’imijyi muri Guverinoma yari iyobowe na Aziz Akhannouch.
Yinjiye muri politiki nyuma y’ishingwa rya PAM mu 2008, maze mu 2009 aba umugore wa mbere uyoboye Umujyi wa Marrakesh.
Mbere yo kugirwa Minisitiri w’Intebe, El Mansouri yari umwe mu bayobozi bakomeye ba PAM. Mu 2024 yabaye umuhuzabikorwa w’ubuyobozi bw’iri shyaka.
Abaye umugore wa kabiri uyoboye Guverinoma mu bihugu by’Abarabu, nyuma ya Najla Bouden wabaye Minisitiri w’Intebe wa Tunisia kuva mu 2021 kugeza mu 2023.
El Mansouri agiye kuyobora Guverinoma mu gihe ishyaka rye rikeneye gushaka abafatanyabikorwa mu yandi mashyaka kugira ngo ribe ryakwishyiriraho Guverinoma.
Ishyaka Justice and Development Party (PJD), ritavuga rumwe n’ubutegetsi, ryegukanye imyanya 54. Ubuyobozi bwaryo bwatangaje ko rizakomeza kuba mu mashyaka atavuga rumwe na Guverinoma nshya.
NDEKEZI JOHNSON / UMUSEKE.RW
