Augustin Lobelle Yembi, Umudepite wo muri Gabon wagaragaye akubita urushyi umukozi wa sosiyete y’indege ya RwandAir ku Kibuga Mpuzamahanga cy’Indege cya Kigali, yaciwe ihazabu ya miliyoni 1,28 Frw.
Urukiko rw’i Libreville ku wa 28 Nzeri 2026 rwategetse ko ahamwa n’icyaha Augustin Lobelle Yembi, umudepite uhagarariye agace ka kabiri ka Lolo-Bouenguidi mu Ntara ya Ogooué-Lolo, rumuhanisha ihazabu ya miliyoni 1,28 Frw.
Urukiko rwamuciye ihazabu y’amafaranga ibihumbi 500 by’ama-CFA, angana hafi na miliyoni 1,28 Frw, hiyongereyeho amafaranga y’ikurikiranarubanza.
Iki kibazo cyaturutse ku rugomo depite Augustin Lobelle Yembi yakoreye ku Kibuga Mpuzamahanga cy’Indege cya Kigali ku wa 3 Nzeri.
Amashusho yasakaye ku mbuga nkoranyambaga UMUSEKE wabonye, agaragara uyu mugabo wari wuzuye uburakare, asatira umukozi wa RwandAir, akamukubita urushyi ari na ko amubwira amagambo atari meza.
Gusa uyu mukozi wa RwandAir wari utuje, yaramwihororeye ndetse na bagenzi be baza guhosha uwo munyamahanga wagaragazaga amahane.
Yembi, wari unyuze i Kigali mu rugendo rwe, yafashwe na polisi. Nyuma yaje gushyikirizwa inzego za Gabon nyuma y’ibiganiro byabaye hagati ya Kigali na Libreville.
Abavoka ba Yembi bagaragaje inzitizi z’uburyo ikirego cyakurikiranywemo, ariko urukiko ruzitesha agaciro urubanza rurakomeza.
Urukiko kandi rwahinduye inyito n’icyiciro cy’icyaha yakurikiranyweho, aho gukomeza kugifata nk’igikorwa cy’ihohotera rikomeye nk’uko byari byatangiye gukurikiranwa, rugishyira mu cyiciro cy’ihohotera ryoroshye maze rumuca ihazabu.
UMUSEKE.RW
