Ishyirahamwe ry’Umukino wa Handball mu Rwanda [FERWAHAND], ryatangaje ko umwaka w’imikino 2026-27, uzatangira tariki ya 10 Ukwakira 2026.
Ni umwaka w’imikino uzatangizwa na Shampiyona y’Icyiciro cya mbere mu bagabo, aho izakinwa n’amakipe 10. Igizwe kandi n’amabwiriza mashya aho FERWAHAND yamaze kuyaha amakipe bireba.
Amwe mu mabwiriza mashya y’uyu mwaka w’imikino 2026-27.
Buri kipe yategetswe kugira abakinnyi batatu batarengeje imyaka 20 bagomba kuzajya bashyirwa ku rutonde rw’abakinnyi bifashishwa kuri buri mukino.
Ikipe izagera mu mikino ya kamarampaka, izaba yemerewe kongeramo abakinnyi babiri b’abanyamahanga biyongera ku bandi bane bari basanzwe bemewe gukoreshwa ariko mu kibuga hazakomeza kwifashishwa abanyamahanga bane nk’uko bisanzwe.
Nyuma ya Shampiyona isanzwe, hazabarwa amanota maze amakipe ane ya mbere ahure muri ½ cya kamarampaka. Iya mbere izahura n’iya kane mu gihe iya kabiri izakina n’iya gatatu.
Mu mikino ya ½ n’umwanya wa gatatu, amakipe azakina atanguranwa intsinzi eshatu [best of five] mu gihe ku mukino wa nyuma bazaba batanguranwa intsinzi enye mu mikino irindwi [best of seven].
Biteganyijwe ko Shampiyona y’uyu mwaka, izasozwa ku wa 30 Ukwakira 2027. APR HC ni yo ibitse igikombe cya Shampiyona cy’umwaka ushize.
UMUSEKE.RW
