Abo mu Ishyaka rya Perezida Tshisekedi baramukiye mu myigaragambyo

Abarwanashyaka b’Ishyaka riharanira ukwishyira ukizana n’iterambere rusange muri Repubulika Iharanira Demokarasi ya Congo (UDPS) riri ku butetegetsi baramukiye mu myigaragambyo bavuga ko ari iy’amahoro kandi ikaba igamije kugaragaza ko bashyigikiye ihinduka ry’Itegeko Nshinga no kongerwa kwa manda Umukuru w’Igihugu yemererwa.

Ni imyigaragambyo yatangiye mu gitondo cyo kuri wa Kabiri tariki 22 Nzeri 2026, ibera mu mihanda yo mu Murwa Mukuru wa Congo, aho abayoboke ba UDPS bahuriye hafi y’urugo rwa Perezida Tshisekedi, bahava berekeza mu mihanda minini y’i Kinshasa.

Baragenda mu mihanda bitwaje amadarapo y’Ishyaka, ibyapa ndetse bananirimba indirimbo batanga ubutumwa ko bashyigikiye ihinduka ry’Itegeko Nshinga, ibiganiro bidaheza by’Abanye-Congo byatangijwe na Perezida n’amatora ya Referandumu yazemerezwamo niba manda Umukuru w’Igihugu yemererwa zahinduka zikava kuri ebyiri, ibyafungurira amarembo Perezida Felix Tshisekedi akaziyamamaza mu 2028.

Ubuyobozi bw’Umujyi wa Kinshasa bwavuze ko bushigikiye iyo myigaragambyo kuko abayiteguye baba mu Ishyaka rinini kandi ari abaturage beza.

Iyi myigaragambyo y’abo mu Ishyaka riri ku butetegetsi ibaye nyuma y’icyumweru kimwe abandi batavuga rumwe n’ubutegetsi bakoze nabo imyigaragambyo.

Ni imyigaragambyo yakozwe ku wa 15 Nzeri 2026, ikorerwa mu bice bitandukanye bya Repubulika Iharanira Demokarasi ya Congo kuva mu murwa Mukuru i Kinshasa n’ahandi.

Iyi yari yateguwe n’abanyepolitiki batavuga rumwe n’ubutegetsi muri Repubulika Iharanira Demokarasi ya Congo (RDC), bahuriye mu ihuriro C64, abayitabiriye bavugaga ko basaba Perezida Félix Tshisekedi kudahindura Itegeko Nshinga ngo aziyamamarize manda ya gatatu mu 2028.

Amatora y’Umukuru w’Igihugu muri Congo ateganyijwe mu myaka ibiri iri imbere ariko impaka zabaye zose mu banyapolitiki bashinja Perezida Tshisekedi gutegura umugambi wo kuguma ku butegetsi mu gihe abo mu Ishyaka rye bo bavuga ko byose bizashingira ku baturage bazihitiramo mu matora ya referandumu yamaze kwemezwa n’Urukiko rushinzwe kurinda Itegeko Nshinga.