Urwego rw’U Rwanda Rushinzwe Igorora, kuri uyu wa Gatanu tariki ya 22 Gicurasi 2026, rwasoje amasomo y’umwaka y’abofisiye bato, banahabwa ipeti rya ‘Assistant Inspector of Prison- AIP’ mu Rwego rw’u Rwanda rushinzwe Igorora, RCS.
Byari ibyishimo n’akanyamuneza kuri aba basore n’inkumi barangije amahugurwa yo ku rwego rw’aba- ofisiye bato binjiye muri RCS.
Ni amasomo yatangirwaga ku Ishuri ry’amahugurwa ryo mu Karere ka Rwamagana (RCS Training School Rwamagana), mu ntara y’Iburasirazuna, aba bakaba ari icyiciro cya kabiri.
Muri aba basoje aya masomo abinjiza mu kazi, barimo abagabo 125 n’abagore 21 . Aba banyeshuri bagizwe n’abari basanzwe mu kazi 84 n’abandi 62 bari basanzwe mu buzima busanzwe bwa gisivile.
Aya mahugurwa yatangiye kuwa 6 Mutarama 2025, bari bagizwe n’abanyeshuri 152 barimo 25 b’igitsina gore.
RCS ivuga ko abanyeshuri batandatu batabashije gusoza amasomo ku mpamvu zitandukanye zirimo ubuzima, gutsindwa amasomo ndetse n’indangagaciro zigomba kurangwa abakozi b’Igorora.
Iki gikorwa cyitabiriwe n’abayobozi batandukanye barimo Umunyamabanga Nshingwabikorwa w’Intara y’Iburasirazuba, Dr Nyirahabimana Jeanne na Minisitiri w’umutekano imbere mu gihugu, Dr Vincent Biruta.
Cyabanjirijwe n’akarasisi kagizwe n’itsinda rya muzika riherekejwe n’aba bofisiye bato.
Mu gihe cy’umwaka aba bofisiye bamaze bahugurwa, bahawe ubumenyi mu micungire y’amagororero y’igihugu n’iy’abagororwa, ubumenyi mu bijyanye n’umutekano, ubumenyi mu bijyanye no kuyobora abandi no kuba abanyamwuga kandi bakarangwa n’ikinyabupfura.
Bakoze imyitozo ibafasha gusobanukirwa neza ibyo bize mu ishuri n’uko bishyirwa mu bikorwa, ndetse banahabwa umwanya wo kwimenyereza umwuga.
Umuyobozi ushinzwe amasomo mu Ishuri ry’amahugurwa ryo mu Karere ka Rwamagana Superintendent Tonny Valens Mutuyimana, yavuze ko aba bofisiye bitezweho gufasha abagororwa gusubira mu muryango nyarwanda ari abaturage beza kandi bafitiye igihugu akamaro.
Ati “Turemeza tudashidikanya ko aba banyeshuri basoje aya masomo, bafite ubushobozi n’umuhate wo gukora neza izi nshingano bazahabwa ndetse no gutanga umusanzu mu kubaka igihugu cyacu. Cyane cyane binyuze mu kwita ku mutekano w’abantu bafunze ndetse n’umutekano w’amagororero , guteza imbere uburnganzira bw’abantu bafunze, no gufasha mu kubagorora, bagasubira mu muryango nyarwanda ari abaturage beza kandi bafitiye igihugu akamaro.”
Minisitiri w’Umutekano mu gihugu, Dr Vincent Biruta yasabye aba Ofisiye bashya gukomeza kurangwa n’indangagaciro nziza no gukorana ubwitange n’ubunyamwuga inshingano zabo.
Ati “Reka mfate nanone mfate uyu mwanya nshimire abofisiye bashya twungutse uyu munsi. Kuba mushoj neza aya mahugurwa,mukaba mwaratsinze neza. Ibyo kandi bikaba bijyana n’imyitwarire myiza yabaranze, ari nayo yibanze izabafasha gukora neza umurimo mumaze kurahirira.Tubitezeho kuzaba abakozi beza ndetse n’abayobozi beza muri uru rwego mwahisemo.”
Yabasabye kwirinda imyifatire igayitse no kwishora mu byaha mu nshingano bagiyemo.
Minisitiri Dr Biruta avuga ko leta y’u Rwanda izakomeza guha iri shuri ubushobozinbwa ngombwa kugira ngo rinoze ibijyanye n’imyigisshirize.
Imbamutima z’abarangije amasomo…
AI Uwitonze Faith avuga yishimiye kuba asoje amasomo bityo agiye gutanga umusanzu we muri sosiyete.
Ati “Icyo ngiye gutanga muri sosiyete, ni ugufatikanya n’Abanyarwanda gukumira ibyaha haba ku rubyiruko ndetse n’abandi bose bahungabanya umutekano w’igihugu cyacu.”
AI Habyarimana Gilbert nawe ati “Uyu munsi uranshimishije cyane kuko n’umunsi nsojeho amasomo yaduteguraga kuba abakozi ‘Urwego rw’U Rwanda rushinzwe Igorora. Twize ibintu bitandukanye ku buryo tugiye mu kazi twizeye ko nta mbogamizi tuzahura nazo kuko tugiyeyo twiteguye.”
Akomeza ati “Ni ugufasha abanyarwanda bagonganye n’amategeko bakagororoka, bagasubira muri sosiyete Nyarwanda barahindutse, barahindutse mu byaha.”
RCS yishimira kuba aba basoje amasomo ariko igasaba ko n’umubare w’abayasoza b’igitsina gore barushaho kwiyongera muri uru rwego.
UMUSEKE.RW
