Icyorezo cya Ebola yo mu bwoko bwa Bundibugyo muri Repubulika Iharanira Demokarasi ya Congo (RDC) gikomeje gukaza umurego, aho abantu 7,022 bamaze kwemezwa ko banduye, barimo 3,398 bamaze gupfa.
Iki cyorezo kandi cyageze mu Ntara ya karindwi nyuma y’uko habonetse umurwayi wa mbere mu Ntara ya Sud-Ubangi.
Raporo y’Ikigo cy’Igihugu cy’Ubuzima Rusange (INSP) yasohotse ku wa 11 Nzeri 2026, igaragaza ko kugeza ku wa 10 Nzeri 2026, umubare w’abanduye Ebola muri RDC wari ugeze ku bantu 7,022.
Muri bo, 3,398 bamaze gupfa, bingana n’igipimo cya 48.4% by’abanduye bose.
Sud-Ubangi ibaye Intara ya karindwi yibasiwe n’iki cyorezo, nyuma ya Ituri, Kivu y’Amajyaruguru, Haut-Uélé, Tshopo, Kivu y’Amajyepfo na Bas-Uélé.
Umurwayi wa mbere wemejwe muri Sud-Ubangi yabonetse mu gace k’ubuzima ka Bulu. Yari umugabo w’imyaka 23, waje gupfa.
Raporo ivuga ko uyu mugabo yari yaravuye mu Ntara ya Kivu y’Amajyepfo ku wa 10 Nyakanga 2026.
Muri rusange, uduce 62 tw’ubuzima two mu Ntara zirindwi tumaze kwibasirwa na Ebola.
Ku wa 10 Nzeri 2026, inzego z’ubuzima zaatangaje ko handuye abantu 80 bashya, hagapfa 49. Muri abo bapfuye, 31 bapfiriye mu baturage, mu gihe 18 bapfiriye mu bigo bivurirwamo abarwayi ba Ebola.
Ituri ni yo Ntara ifite abanduye benshi, aho imaze kugira 5,538, bangana na 78.9% by’abanduye bose muri RDC.
Ebola yo mu bwoko bwa Bundibugyo ikomeje kwibasira RDC kuva muri Gicurasi 2026. Kugeza ubu, nta rukingo cyangwa umuti byihariye byemejwe kuri ubu bwoko bw’iyi ndwara.
Ku wa 21 Kanama 2026, i Kinshasa hakiriwe icyiciro cya mbere cy’inkingo 16,520 mu nkingo 50,120 iki Gihugu kizakira mu rwego rwo guhangana na Ebola.
Ishami ry’Umuryango w’Abibumbye ryita ku Buzima (OMS) ryatangaje ko izi nkingo zo mu bwoko bwa Ervebo zishobora kwifashishwa mu guhangana n’iki cyorezo, hashingiwe ku kuba zarigeze gukoreshwa mu kurwanya Ebola yo mu bwoko bwa Zaire yishe abarenga 11,000 mu Burengerazuba bwa Afurika hagati ya 2013 na 2016.
MUGIRANEZA THIERRY / UMUSEKE.RW
