Umutwe w’Ingabo z’Ibihugu byo mu Burasirazuba bwa Afurika ziteguye gutabara mu bihe bikomeye (EASF), uri kugirira inama y’iminsi itatu mu Rwanda, igamije kwemeza inyandiko ngenderwaho y’ibikorwa bihuriweho by’Ingabo zo mu Kirere , amabwiriza agenga imikorere, ndetse n’amasezerano y’ubwumvikane ajyanye n’ibikorwa by’ubutabazi mu bihe by’ibiza n’ibisanzwe.
Iyi nama yatangiye kuwa 15-19 Kamena 2026, yafunguwe ku mugaragaro na Brigadier General Louis Kanobayire, Umuyobozi w’Ishuri ry’Ingabo zo mu Kirere z’u Rwanda, ahagarariye Umugaba Mukuru w’Ingabo z’u Rwanda .
Iyi nama yahuje impuguke ziturutse mu bihugu bigize EASF birimo u Rwanda, Uganda, Kenya na Ethiopia, hagamijwe gusuzuma no guhuza inyandiko z’ingenzi z’imikorere zigamije kongerera ubushobozi ingabo zo mu kirere mu karere no kurushaho gushimangira ubufatanye mu bikorwa by’ubutabazi no gutabara mu gihe cy’ibiza.
Brigadier General Louis Kanobayire yavuze ko “iyi nama igaragaza ubushake n’ubwitange bw’ibihugu bigize EASF mu gushimangira ubufatanye bw’akarere no kongera ubushobozi bwo kwitegura no gutabara mu gihe cy’ibibazo n’ibiza byibasira abaturage.”
EASF ni umwe mu mitwe y’akarere igize Ingabo za Afurika zihora ziteguye gutabara.
EASF ifite inshingano zo gutegura, guhuza no kuyobora ibikorwa byo gushyigikira amahoro mu karere ka Afurika y’Iburasirazuba.
UMUSEKE.RW
