Ubwo hasozwaga irushanwa ryahuje amagarage ane y’imodoka akorera mu Mujyi wa Kigali, Igarage rya Honest Auto Vehicle Garage Ltd ryegukanye igikombe banyagiye Toyota Rwanda ibitego 4-0.
Iri rushanwa ryahuje amagarage ane yo mu Rwanda ariko asanzwe akorera mu Mujyi wa Kigali.
Ni irushanwa ryateguwe hagamijwe gutanga ubutumwa butandukanye burimo gukangurira Abanyarwanda kwirinda ibiyobyabwenge n’inzoga zitujuje ubuziranenge, cyane ko u Rwanda ruri mu nkubiri yo guca ‘inzoga z’ibyuma.’
Uretse ubu butuma kandi, Urugaga rw’Amagarage mu Rwanda, rwari rugamije gutuma abakora umwuga wo gukora imodoka bidagadura nyuma y’akazi bakora ndetse bagasabana.
Hakinwe imikino ya 1/2, maze ebyiri za mbere zihurira ku mukino wa nyuma wabereye kuri Tapis Rouge i Nyamirambo.
Umukino usoza iri rushanwa, wabaye kuwa Gatandatu, tariki ya 5 Nzeri Saa Cyenda z’amanywa.
Igarage rya Honest Auto Vehicle Garage Ltd, ryanyagiye irya Toyota Motor Ltd ibitego 4-0 mu mukino waryoroheye.
Ikipe ya mbere, yahembwe igikombe, imidari ndetse na 1,000,000 Frw mu gihe iya Kabiri yahembwe imidari n’ibihumbi 500 Frw.
Visi Perezida wa mbere w’Urugaga rw’Amagarage mu Rwanda, Niyitegeka Jean Eric, yavuze ko ari rushanwa bifuza kwagura kandi rikazaba ngarukamwaka.
Yakomeje yishimira uko iry’uyu mwaka ryagenze kandi ubutumwa bifuzaga kuritangiramo bwatanzwe.
Ati “Aya marushanwa ni ubwa mbere abaye mu rugaga rwacu. Yateguwe kubera impamvu z’ibihe turimo ariko yahoraga yifuzwa. Byahuriranye n’uko hari igikorwa cyo kurwanya Ibiyobyabwenge, ibyuma, inzoga z’inkorano, uburara, urugomo n’ibindi.”
“Duhita tuvuga tuti ko dusanzwe dufite abantu, aho twatangira ubutumwa kandi ubwiganze bw’abakora mu magarage usangamo urubyiruko. Ni bwo rero hatangiye aya marushanwa ariko atangira duhereye ku yo twari bugufi bwayo.”
Jean Eric yakomeje avuga ko impamvu yatumye batangirana amakipe make ari uko bifuzaga gukora irushanwa riri ku rwego rwiza kandi rushimishije.
Muri iri rushanwa, hasifuye abasifuzi batanzwe na FERWAFA, Polisi y’Igihugu yari ku kibuga ndetse hari n’imbangukiragutabara yo gufasha uwahagarira ikibazo.
Hatangiwe ubutumwa bwari mu byiciro bitatu. Ubusabane hagati y’abakora umwuga w’ubukanishi bw’imodoka, cyane ko urwego rw’amagarage mu Rwanda rumaze kwaguka.
Intego ya Kabiri yari igamijwe, kwari ukujya mu mujyo wa Leta wo kurwanya ibiyobyabwenge, inzoga z’inkorano zizwi nk’Ibyuma n’ibindi.
Ati “Nkunda kubwira abantu nti ntabwo ushobora gukora moteri wanyoye inzoga, wabivanga. Ntabwo ushobora gukora amatsinga wanyoye, wabivanga.”
Intego ya Gatatu yari ukugira ngo bakangurire abantu kwitabira gahunda za Leta.
Uyu Muyobozi yakomeje avuga ko basanze bagomba kunganira Leta mu bungarumbaga bwo kwitabira gahunda zayo.
Amafaranga yakoreshejwe mu gutegura buri kimwe ngo irushanwa rigende neza, yavuye mu bushobozi bw’ubuyobozi bw’Urugaga rw’Amagarage mu Rwanda ahubwo amakipe asabwa kujya yimenya gusa mu gihe yaje gukina.
Iri rushanwa ryabaga ku nshuro ya mbere, rizajya rikinwa buri mwaka nk’uko byemejwe na Visi Perezida wa mbere w’Urugaga rw’Amagarage mu Rwanda.
UMUSEKE.RW
