Urwego rw’Ubugenzacyaha (RIB), rwatangaje ko rwataye muri yombi Umunyamabanga Nshingwabikorwa w’Umurenge wa Bugarama mu Karere ka Rusizi, Ndamyimana Daniel,akurikiranyweho icyaha cyo guhakana Jenoside.
Umuvugizi wa RIB, Dr Murangira B Thierry kuri uyu wa Kabiri tariki ya 14 Mata 2026, yabwiye RBA ko uyu muyobozi yashishikarije abaturage ko bajya bibuka ku itariki ya 6 Mata .
Yagize ati “We ubwe yifuzaga ko ngo kwibuka muri uwo Murenge byatangira ku itariki 6 Mata, iperereza ryarakozwe, rirakorwa, amakuru amaze gutangwa, abanza kubeshya ko yabisabwe n’abarokotse Jenoside muri uwo Murenge.”
Yakomeje agira ati “Iperereza rikomeje aravuga ngo burya nabeshyaga ni ibyiyumviro byanjye ni ko numvaga njyewe mbyifuza.”
Dr Murangira yatangaje ko iperereza rigikomeje ngo hamenyekane impamvu uwo muyobozi yari afite ibyo byifuzo.
Ati “ Ubona ko harimo kugoreka ukuri ugamije kuyobya rubanda. Ibi biba bikwiye kubera isomo ngo batazagwa mu mutego nk’uyu.”
RIB yasabye abaturage kwirinda ibyaha byose birimo n’ibiganisha ku guhakana jenoside no kuyipfobya.
Ati “ Aho waba uri hose, bitinde bitebuke, ukuboko k’ubutabera kuzakugeraho.”
UMUSEKE.RW
