Mu gihe icyerekezo cy’u Rwanda ari ukubaka ubukungu bushingiye ku bumenyi n’ikoranabuhanga, Ikigo TAJYIRE Group Holdings Ltd cyatangije gahunda eshatu zigamije gufasha urubyiruko kongera ubumenyi mu ikoranabuhanga, guteza imbere guhanga udushya no kubona amahirwe y’akazi, binyuze mu guhuza uburezi n’ibikenewe ku isoko ry’umurimo.
Izi gahunda zatangijwe ku wa 25 Kamena 2026 ku nsanganyamatsiko igira iti “Kubaka ejo hazaza h’u Rwanda rushingiye ku ikoranabuhanga”, zirimo TAJYIRE Robotic System for School Learners, TecBridge Program na TAJYIRE Distribution Engine (TDE).
Izi gahunda zose zubakiye ku ntego yo gushyiraho amahugurwa, ubushakashatsi no guhanga udushya ku buryo ubumenyi urubyiruko rubona buhinduka amahirwe y’akazi n’ubucuruzi.
Uyu muhango witabiriwe n’abahagarariye Minisiteri y’Ikoranabuhanga na Inovasiyo (MINICT), RTB , abarimu, abanyeshuri n’abafatanyabikorwa bo mu rwego rw’abikorera.
Umuyobozi w’Ishami ry’Ikoranabuhanga muri RTB, Emmanuel Asher Mutijima, yavuze ko TAJYIRE ari urugero rwiza rw’ubufatanye bushobora kubaho hagati y’amashuri n’inganda.
Ati “TAJYIRE ni urugero rwiza rw’uburyo uburezi bwa tekiniki bushobora guhuzwa n’ibikenewe n’inganda. Itanga amahirwe yo kwimenyereza umwuga, gukora imyitozo ngiro mu nganda no kubona inzira iganisha ku kazi.”
Yakomeje avuga ko RTB iri mu biganiro na Tajyire bigamije kwemeza ku mugaragaro gahunda z’amahugurwa itanga, kugira ngo abazahiga bazahabwe impamyabushobozi zemewe.
Abanyeshuri basuye ikigo cya Tajyire bavuga ko cyabafashije gusobanukirwa neza amasomo biga mu ishuri binyuze mu bikorwa bifatika.
Shema Alain, wiga mu mwaka wa gatanu w’amashuri yisumbuye, yavuze ko ikibazo cyo kubura ibikoresho by’imyitozo kigihari mu mashuri menshi.
Ati “Ibyo nabonye muri Tajyire birashimishije cyane. Uru rubuga rushobora gufasha cyane abanyeshuri bo mu mashuri y’imyuga kubona ubumenyi bufatika.”
Nirere Husna yavuze ko imyitozo yahakoreye yamufashije gusobanukirwa neza ibyo yigaga mu ishuri, anasaba ko ibigo nk’iki byakongera umubare kugira ngo urubyiruko rwo hirya no hino mu gihugu rubone amahirwe angana yo kwiga ikoranabuhanga rishingiye ku bikorwa.
Uwashinze akaba n’Umuyobozi Mukuru wa Tajyire Group Holdings Ltd, Lambert Gahungu, yavuze ko icyerekezo bafite atari ugutanga amahugurwa gusa, ahubwo ari ukubaka urwego rwuzuye rufasha urubyiruko kuva ku bumenyi rugana ku guhanga udushya no kugera ku isoko.
Yagize ati “Turimo kubaka urusobe ruhuza amahugurwa, guhanga udushya n’isoko, ku buryo ubumenyi abantu biga buhita bubafungurira amahirwe.”
Yavuze ko Tajyire ikorera mu buryo buhuza isoko ry’ubucuruzi, ikigo cy’amahugurwa n’ishami ry’ubushakashatsi n’iterambere, byose bikuzuzanya kugira ngo abafite ibitekerezo bishya babone aho babyigira, aho babiteza imbere n’aho babigeza ku isoko.
Gahungu yavuze ko kugeza ubu abatekinisiye n’abacuruzi b’ibikoresho by’ikoranabuhanga barenga 1,300 bamaze kwinjira muri ubu bucuruzi, ndetse ko gahunda ari ukuyigeza no mu yindi mijyi yo mu gihugu kugira ngo amahirwe nk’aya agere ku rubyiruko rwinshi.
Gahungu yavuze ko Afurika ikwiye kuva ku rwego rwo gukoresha ikoranabuhanga rikorewe ahandi gusa, ahubwo igatangira kurihanga no kurikora.
Yagize ati “Aya makoranabuhanga ni yo ari guhindura isi muri iki gihe. Ikibazo si ukumenya niba tuzayakoresha, ahubwo ni ukumenya niba tuzayakora cyangwa tuzakomeza kuyakoresha gusa.”
Yasabye ko habaho ubufatanye burushijeho hagati ya Leta, amashuri makuru na za kaminuza ndetse n’abikorera, kugira ngo u Rwanda rubashe kubaka urwego rw’ikoranabuhanga rushingiye ku bumenyi n’udushya bikorerwa imbere mu gihugu.
NDEKEZI JOHNSON / UMUSEKE.RW
