Ikigo cya Kenya Gishinzwe Ubuziranenge, Kenya Bureau of Standards (KEBS), cyatangaje ko kitemera impamvu zashingiweho Ikigo cy’Igihugu gishinzwe Ibiribwa n’Imiti (Rwanda FDA), gihagarika ku isoko ryo mu Rwanda inzoga eshanu zo mu bwoko bwa rikeri ziva muri Kenya, kivuga ko zitujuje ubuzirange.
Ikigo cy’Igihugu gishinzwe Ibiribwa n’Imiti (Rwanda FDA) giherutse gutangaza ko gihagaritse inzoga zitumizwa mu mahanga zirimo Konyagi, Gilbey’s zikorerwa muri Kenya n’izindi zigera kuri 52, mu rwego rwo gukomeza kurengera ubuzima n’umutekano by’Abanyarwanda.
Mu itangazo RFDA yagize iti “Rwanda FDA itegetse abatumiza ibi binyobwa mu mahanga guhita batangiza igikorwa cyo kubikusanya byose no kubikura ku isoko.”
Mu itangazo Kenya Bureau of Standards (KEBS),yasohoye kuwa 11 Kanama 2026, ivuga ko inzoga eshanu zo muri Kenya ziherutse guhagarikwa by’agateganyo mu Rwanda zakorewe igenzura rikomeye, ririmo ibizamini bya laboratwari n’igenzura ry’inganda n’ibicuruzwa ku isoko.
KEBS ivuga ibicuruzwa byahagaritswe byari bifite ibyangombwa bigaragaza ubuziranenge bwa Kenya n’Umuryango wa Afurika y’Iburasirazuba.
Ivuga ko inzoga zahagaritswe kandi zifite icyangombwa cy’ubuziranenge ari Kenya King Gin na Safari Gin zikorwa n’inganda London Distillers Kenya Ltd ndetse na Avalon na Sweet Berry Potable Spirits zikorwa n’uruganda Zheng Hong (K) Ltd hamwe Gilbey’s Gin ikorwa n’uruganda Kenya Breweries Ltd.
KEBS iti “Izi nzoga zari zifite ibyangombwa bisabwa bigendanye n’inzoga zikorwa zirimo arukoro ( alcohol), igipimo cya methanol ,uburyo zibikwa ndetse n’imikoresherezwe yazo.”
Ikomeza iti “Nyuma y’itangazo rya Rwanda FDA, , KEBS yihutiye kugenzura icyo kibazo ireba ibyo binyobwa niba bifite ibyangombwa, raporo ijyanye n’ubuziranenge bwazo n’ibijyanye n’isoko.”
KEBS ivuga ko ibyavuye muri ubwo bugenzuzi, mu bipimo byo muri za raboratwari,ibiganiro na ba nyiri nganda,ibigo bishinzwe ubuziranenge mu muryango wa Afurika y’Iburasirazuba hamwe n’Akanama gashinzwe ibipimo n’ubiziranenge byagaragaje ko ibyo bicuruzwa bitanu byahagaritswe ba Rwanda FDA byujuje ibisabwa mu bijyanye n’ubuziranenge.
Ivuga ko izakomeza gukora ibishoboka byose mu gutuma ibicuruzwa by’imbere mu gihugu no hanze yarwo byizerwa.
Kugeza ubu ntacyo Rwanda FDA iragira icyo ivuga kuri iri tangazo.
U Rwanda rukomeje ubukangurambaga bwo kurwanya inzoga zitujuje ubuziranenge no gusaba abaturage kuzireka burundu.
Inzego z’Ubuzima mu Rwanda zivuga ko isuzuma ryakozwe ryagaragaje ko abantu 50 bishwe n’inzoga zitujuje ubuziranenge kuva muri Mutarama 2026, 100 barahuma naho ibihumbi 11 bo babaswe n’inzoga.
UMUSEKE.RW
