Minisitiri w’Imari n’Igenamigambi ry’ubukungu, Yusuf Murangwa, yagejeje ku Nteko Ishinga Amategeko umushinga w’ingengo y’imari ingana na miliyari 7,796.3Frw azakoreshwa mu mwaka 2026/2027.
Ingengo y’imari y’uyu mwaka yiyongereyeho 12% ugereranyije na miliyari 6,952.1Frw yakoreshejwe mu ngengo y’imari yavuguruwe ya 2025/2026.
Ingengo y’imari yateganyijwe muri uyu mwaka izibanda mu bikorwa by’ibanze bitanga umusaruro ku gihugu harimo gushimangira umusaruro w’ubuhinzi, kuzamura inganda, kwihutisha guhanga imirimo, no gukomeza gahunda y’ubukungu bwihuse.
Minisitiri Murangwa Yusuf yabwiye Inteko Ishinga Amategeko, Abadepite na Sena ko iyi ngengo y’imari yashyizweho hatekereza imbogamizi zigiye ziri ku Isi, bityo ikazakoreshwa mu guteza imbere ubuhinzi, guhanga imirimo, no kubaka ubukungu buhamye.
Imbaraga nyinshi zizashyirwa mu bijya mu ishoramari ry’ubuhinzi no kuhira imyaka, no gukomeza gushora imari mu bikorwa remezo n’ingufu, ndetse no muri gahunda zigamije gushyigikira abantu b’amikoro make.
Ingengo y’imari iteganyijw emu mwaka wa 2026/2027 iragera kuri miliyari 7,796.3Frw, agera kuri miliyari 5.273.8Frw azava mu misoro yo mu gihugu imbere, inkunga zizaturuka hanze ni miliyari 548.3Frw naho inguzanyo ni miliyari 1,974.1Frw.
Amafaranga azakoreshwa mu mishinga y’iterambere agera kuri miliyari 3,010.8 naho amafaranga azakoreshwa mu bindi bikorwa bya Leta miliyari 4,785.5Frw.
Mu bijyanye no kwihutisha gahunda y’iterambere, Minisitiri w’Imari yavuze ko iterambere ry’ubukungu ryahariwe 63% y’ingengo y’imari yose ni ukuvuga miliyari 4,900.9Frw.
Ayo azakoreshwa mu kwihutisha iterambere ry’ubuhinzi, kwagura imiyoboro y’amashanyarazi, amazi, n’isuku n’isukura, guteza imbere uburyo bwo gutwara abantu n’ibintu, guteza imbere imijyi no gutuza abantu.
Amafaranga yandi azaboneka azafasha mu guhangana n’imihindagurikire y’ikirere, guteza imbere inganda z’imbere mu gihugu, aho, kuzamuka ibyoherezwa mu mahanga, iterambere ibigo by’imari, no guhanga imirimo.
Ikindi gice cy’ingengo y’imari kingana na 22% ni ukuvuga miliyari 1,711.3Frw azakoreshwa mu guteza imbere ireme ry’ubuvuzi n’ibyavuye n’uburezi, gushyigikira imibereho y’abaturage, guteza imbere ibijyanye n’imirire, no guteza imbere ibikorwa by’imiryango n’uburinganire, no gukumira no kurwanya ibiza.
Guteza imbere imiyoborere bizatwara 15% ni ukuvuga miliyari 1,184.0Frw.
Inkunga zigamije gutanga serivisi nziza, imiyoborere myiza, imicungire y’imari ya Leta, gushimangira ubutabera, amahoro n’umutekano, gukumira ibyaha, na diplomasi y’ubukungu.
Uyu mushinga w’itegeko watowe n’abadepite 65 nta n’umwe wifashe nta n’uwatoye imfabusa, hazakurikiraho kuwugeza muri Komisiyo ibishinzwe kugira ngo uzigweho neza.
UMUSEKE.RW
