Minisiteri Ishinzwe ibikorwa by’Ubutabazi,MINEMA, yasabye abakiri ahantu hashobora gushyira ubuzima bwabo mu kaga kuhimuka hakiri kare.
Ibi MINEMA ibitangaje nyuma y’imvura yaguye ahantu hatandukanye ku mugorobwa wo ku cyumweru,tariki ya 13 Nzeri 2026, ikangiza inzu z’abaturage .
Mu Murenge wa Rwimbogo, mu Kagari ka Munini, mu isantere iri mu Midugudu ya Humure na Kabeza, iyi mvura yangije inzu 34 z’abaturage.
Umuryango w’Abibumbye (Loni) wateguje abatuye Isi kwitegura guhangana n’ibiza bishobora guterwa n’ikinyabihe cya El Niño, gituruka ku bushyuhe budasanzwe bw’amazi yo mu Nyanja ya Pasifika.
Ikinyabihe cya El Niño gishobora gutuma habaho imihindagurikire y’ikirere ikazana ubushyuhe bukabije, amapfa, imvura nyinshi n’imyuzure mu bice bitandukanye by’Isi.
Ikigo cy’u Rwanda gishinzwe Ubumenyi bw’Ikirere (Meteo Rwanda) giherutse gutangaza ko mu gihembwe cy’imvura y’Umuhindo, kuva muri Nzeri kugeza mu Ukuboza 2026, hateganyijwe imvura iri hagati ya milimetero 300 na 1,000.
Iyi mvura izaba iri hejuru y’impuzandengo y’imvura isanzwe igwa mu gihe cy’Umuhindo mu myaka 30 ishize, iri hagati ya milimetero 279 na 962.
Mu kiganiro na RBA,Minisitiri Ushinzwe ibikorwa by’ubutabazi, Maj. Gen. (Rtd) Albert Murasira, yavuze ko u Rwanda rwiteguye guhangana n’ingaruka zishobora guterwa n’iyo mvura nyinshi.
Ati “Twabwiye abaturage kuzirika ibisenge cyane,bakanagerageza kwitwararika mu gihe cy’imvura.Ariko ikingenzi ni ukureba aho batuye,abari mu manegeka hashobora gushyira ubuzima bwabo mu kaga,bashobora kuhimuka, tukanabafasha, tugafatanya n’inzego z’ibanze kugira ngo babone aho bimukira.“
Akomeza ati”Minisiteri duhora twiteguye kandi ntabwo dukora twenyine,dukorana n’inzego zitandukanye,birumvika ko haramutse hari Ibiza,tugomba guhita dutabara mu buryo bwihuse,dufite aho kubashyira.Dufite ibikoresho bitandukanye ,igihe cyose biba bihari kugira ngo bitabare abaturage.”
MINEMA isaba abaturage gufata ingamba zo guhangana n’ibiza bishobora guterwa n’imvura nyinshi. Muri zo harimo kuzirika ibisenge by’amazu, gusana no gukomeza inzu, gushyiraho imireko n’imiyoboro y’amazi, gusibura inzira z’amazi ndetse no guca inzira z’amazi.
El Niño yabaye mu Isi mu 2023 yagize ingaruka zikomeye ku Rwanda, aho imvura nyinshi yateje imyuzure yahitanye abantu barenga 130, ikangiza amazu arenga 6,000 n’ibindi bikorwa remezo mu gice cy’Uburengerazuba bw’Igihugu muri Gicurasi 2023.
UMUSEKE.RW
