Urwego rw’Igihugu rushinzwe Iterambere (RDB), rwatangaje ko mu mwaka ushize wa 2025, ubukerarugendo bwinjirije u Rwanda miliyoni 685$ bigizwemo uruhare n’abantu benda kugera kuri miliyoni n’igice barusuye.
Ni ibikubiye muri Raporo y’umwaka wa 2025 y’Ibikorwa by’Urwego rw’u Rwanda rushinzwe Iterambere (RDB), mu byakozwe mu ishoramari, ubucuruzi n’ubukerarugendo.
Raporo ya RDB, igaragaza ko mu mwaka ushize, ubukerarugendo bw’u Rwanda bwinjije miliyoni 685 z’amadolari mu 2025 avuye kuri miliyoni 647 z’amadolari mu 2024.
Ni izamuka ryagizwemo uruhare n’abashyitsi miliyoni imwe n’igice (1,490,000) basuye u Rwanda bakuruwe n’ibyiza nyaburanga birimo Pariki z’Igihugu.
Ni mu gihe ubukerarugendo bushingiye ku nama n’ibirori bwinjije miliyoni 94.7 z’amadolari ya Amerika, akaba ari izamuka rya 11% ugereranyije na miliyoni 84.8 z’amadolari yabonetse mu 2024.
RDB ivuga ko iri zamuka ryatewe n’ibirori n’inama mpuzamahanga n’iz’akarere 165 byabereye mu Rwanda.
Iki kigo kikavuga ko ibirori by’ingenzi byabaye harimo Shampiyona y’Isi y’Amagare (UCI Road World Championships 2025) yabaye muri Nzeri, 2025. Yari ibaye bwa mbere muri Afurika.
Igitaramo cya Move Afrika: Kigali cyarimo John Legend; inama ya Mobile World Congress; n’imikino ya Basketball Africa League (BAL) mu kiciro cyayo cya gatanu, n’ibindi.
RDB iti “Ibi birori byagize uruhare rukomeye mu kwiyongera kw’abashyitsi basuye igihugu, kumenyekana k’u Rwanda ku rwego rw’isi, no gukura kw’izina ry’u Rwanda mu kwakira inama n’ibirori (MICE).”
Handitswe ishoramari rya miliyari 2.6$…
Iyi raporo ya RDB, ikomeza igaragaza ko mu 2025 handitswe ishoramari rya miliyari 2,62 z’amadolari mu mishinga igera kuri 799 yiyongereye ivuye kuri 612 mu mwaka wabanje wa 2024.
RDB ivuga ko ubucuruzi bw’imitungo itimukanwa, inganda zitunganya ibintu n’ubucukuzi bw’amabuye byagize uruhare runini mu ishoramari, bifasha kwinjiza imari no guteza imbere ihangwa ry’imirimo.
Ivuga ko umusaruro w’ishoramari ry’abikorera riturutse hanze (FPC) nawo wakomeje gutanga umusaruro.
RDB ivuga ko yisunze igenzura rya ‘Foreign private capital (FPC), ishoramari ritaziguye rikomoka hanze (FDI) ryazamutse rigera kuri miliyoni 872.9 z’amadolari ya Amerika mu 2024, rivuze izamuka rya 21.8% ugereranyije na miliyoni 716.5 z’amadolari yari yanditswe mu 2023 (nk’uko byari muri raporo ya FPC yo mu 2024).
RDB iti “Ibi byose bishyize hamwe, byerekana icyizere kirambye abantu bafitiye politiki z’u Rwanda n’ubushobozi bwarwo bwo gushyigikira ishoramari binyuze mu kurishyira mu bikorwa, aho kuba gusa mu kurimenyekanisha.”
Ibyo u Rwanda rwohereza hanze byariyongereye…
RDB ivuga ko ibicuruzwa u Rwanda rwohereje mu mahanga byinjije miliyari 3,6 z’amadolari hashingiwe ku mikorere ihamye mu nzego zirimo ubucukuzi bw’amabuye y’agaciro, ubuhinzi, n’ubuhinzi bw’imboga n’indabo.
Iki kigo kikavuga ko ibyoherezwa hanze bishingiye kuri sreivisi byiyongereyeho 2.7% ugereranyije n’umwaka ushize. Bishimangira uruhare rwabyo mu musaruro mbumbe w’ibyoherezwa hanze.
Ubwikorezi bw’imizigo mu kirere bwiyongereyeho 2.4% bugera kuri toni 6,257, buvuye kuri toni 6,113 mu 2024.
Umuyobozi Mukuru wa RDB, Jean-Guy Afrika, ashima uburyo umwaka ushize wagenze neza mu bukerarugendo,ashimangira ko RDB izakomeza guteza imbere no gushyigikira ishoramari.
Ati “Umusaruro w’umwaka wa 2025 ugaragaza intambwe ikomeye imaze guterwa mu gushimangira inkingi z’ubukungu bw’u Rwanda no kugera ku ntego twiyemeje mu bijyanye n’ishoramari, ibyoherezwa hanze, ubukerarugendo, n’itangwa rya serivisi.”
Yakomeje ati “Twiyemeje gukomeza kubaka imiterere y’ubucuruzi yizewe kandi ihatana, ituma urwego rw’abikorera rwaguka, rugatuma n’iterambere rirambye rigerwaho.”
RDB ivuga ko izakomeza gushyira mu bikorwa Gahunda ya Kabiri y’Igihugu yo Kwihutisha Iterambere (NST2) hamwe n’ingamba zayo za 2025–2030, yibanda ku kwagura ishoramari, gukomeza urwego rw’ibyoherezwa hanze, guteza imbere ubukerarugendo no guteza imbere udushya mu nzego zitandukanye.
UMUSEKE.RW
