Umukuru w’Igihugu cya Tanzania, Samia Suluhu Hassan yasuye umukinnyi wa Yanga Africans, Pacome Zouzoua uherutse kuvunikira mu mukino usoza Shampiyona ya Tanzania.
Uyu mukinnyi urwariye mu Bitaro Bikuru bya Aga Khan biri i Dar es Salaam, yavunikiye mu mukino usoza Shampiyona ya y’Icyiciro cya mbere muri iki gihugu (NBC).
Ni umukino warangiye Yanga Africans itsinze JKT Tanzania ibitego 3-0, biyihesha kwegukana igikombe cya Shampiyona 2025-26.
Kuri uyu wa mbere, tariki ya 6 Nyakanga 2026, ibicishije ku mbuga nkoranyambaga zayo, iyi kipe ikunzwe na benshi muri Tanzania, yavuze ko yishimira ko Umukuru w’Igihugu yasuye Pacome akamwihanganisha.
Bagize bati “Umukuru w’Igihugu cya Tanzania, Samia Suluhu Hassan, uyu munsi yasuye umukinnyi w’ikipe y’Abaturage, Pacome Zouzoua, aramwihanganisha ku bw’imvune aherutse kugirira mu mukino wa Shampiyona hagati ya JKT Tanzania.”
Pacome yagize imvune ikomeye aho ukuguru kwe kw’iburyo kwahindukiye, ndetse inzobere mu buvuzi bw’imvune bakavuga ko atabonye ubuvuzi bwiza ashobora guhagarika gukina.
Zouzoua ni umwe mu bakinnyi b’inkingi za mwamba muri Yanga Africans.
UMUSEKE.RW
