Ibihugu by’u Rwanda na Sénégal byasinyanye amasezerano mashya 11 agamije kurushaho guteza imbere umubano n’ubufatanye hagati y’ibihugu byombi.
Ni amaszerano yasinyiwe i Kigali ku wa Gatatu tariki 7 Ukwakira 2026, asinywa na Minisitiri w’Ububanyi n’Amahanga n’Ubutwererane w’u Rwanda, Amb. Olivier Nduhungirehe, hamwe na mugenzi we wa Sénégal, Cheikh Niang, mu nama ya mbere ya Komisiyo Nkuru ihuriweho y’u Rwanda na Sénégal ishinzwe ubufatanye.
Muri iyi nama, Minisitiri Nduhungirehe na Minisitiri Niang bayoboye ibiganiro byibanze ku gukomeza umubano w’ibihugu byombi no kwagura ubufatanye mu nzego zitandukanye.
Ba Minisitiri b’Ububanyi n’Amahanga basinye amasezerano 11 y’ubufatanye n’ubwuvikane, arimo: ayerekeye ibiganiro no guhana inama mu bya politiki, amasezerano mu ikoranabuhanga no guhanga udushya, ayo mu rwego rw’ubukerarugendo, urubyiruko, umuco n’ubugeni ndetse na siporo.
Hasinywe kandi imbanziriza maserano mu bijyane n’amashuri makuru n’ubushakashatsi mu bya siyansi n’ibijyanye n’ubuziranenge.
Hasinywe kandi amasezerano ajyanye no gufashanya mu mategeko n’ibireba abanyabwaha harimo koherezanya abakekwaho ibyaha ndetse no guhana abantu bakatiwe ibihano hagati y’ibihugu .
U Rwanda na Sénégal ni ibihugu bifitanye umubano mwiza, ushimangirwa n’ingendo zagiye zikorwa hagati y’abakuru b’ibihugu ndetse n’abandi bayobozi muri Guverinoma.
Ibihugu byombi kandi bifitanye amasezerano arimo ay’ubufatanye mu by’umuco yasinywe mu 1975, ay’ubutwererane rusange yasinywe mu 2004, ay’ishyirwaho rya komisiyo ihoraho ishinzwe kugenzura umubano w’ibihugu byombi yasinywe mu 2016 ndetse n’amasezerano y’ubufatanye ari hagati y’Urwego rw’Igihugu rw’Itangazamakuru (RBA) na Radio Television Sénégalaise.
MUGIRANEZA THIERRY/ UMUSEKE.RW
