Isinda rya Vestine na Dorcas bazwi mu ndirimbo zo guhimbaza Imana, ryatangaje ko ryatandukanye na MIE irebererwa na Murindahabi Iréné ari nawe wari ubafite mu nshingano.
Batandukanye nyuma yuko aba bahanzi baherukaga gukora igitaramo muri Canada cyanatumye Ishimwe Vestine afata icyemezo cyo kugumayo ku mpamvu zitatangajwe.
Mu itangazo iri tsinda ryashyize hanze, bahamije ko imikoranire bari bafitanye na MIE yarangiye.
Itangazo rigira riti “ Nyuma yo gutekereza cyane no kubisesengura mu buryo bwimbitse, twe Vestine na Dorcas twafashe icyemezo cyo guhagarika ku mugaragaro imikoranire twari dufitanye na MIE.”
Vestine na Dorcas bavuze ko MIE yagize uruhare mu kubafasha kugera ku nzozi zabo nk’abahanzi.
Bati “Ni icyemezo cyari kigoye, twishimira byinshi twagezeho turi kumwe ndetse n’ibihe byiza twagiranye, icyakora, muri iki gihe twumva ari ngombwa gukomeza urugendo rwacu twigenga, mu buryo bujyanye n’icyerekezo cyacu, indangagaciro zacu ndetse n’ejo hazaza twifuza kubaka.”
Si ubwa mbere bitangajwe ko aba bahanzi bagerageje gutandukana na MIE kuko 2021 nabwo havutse ukudahuza hagati ya MIE na bamwe mu bagize umuryango wabo basabaga ko basesa amasezerano, icyakora bakomeza gukorana.
Kuva 2025 Ishimwe Vestine wo mu itsinda rya Vestine na Dorcas yashyingiranywa n’Umunya-Burkina Faso Idrissa Ouédraogo, imikorere yo mu rugendo rw’umuziki rwatangiye kugenda gacye ndetse bamwe batangira no gutekereza ko baba bagiye guhagarika umuziki burundu.
Itsinda ry’abavandimwe Vestine na Dorcas ryatangiye umuziki wo kuramya no guhimbaza Imana mu mpera z’umwaka wa 2020 ubwo batangiraga gukorana n’Umujyanama Murindahabi Irene.
Basohoye indirimbo yabo ya mbere yitwa “Papa” mu ntangiriro za 2021, bakomeza kwamamara cyane biturutse kuri iyi sosiyete yabo ya MIE.
UMUSEKE.RW
