Mu gitaramo cya Alexis Dusabe abana basabye kurindwa ubuzima bw’umuhanda 

Mu gitaramo cy’umuramyi Alexis Dusabe,cyabaye kuri iki cyumweru tariki ya 21 Gicurasi 2023,abana barererwa mu Kigo cya SOS village, bahaye ubutumwa ababyeyi bibagirwa inshingano zo kurera bigatuma bajya mu muhanda, basaba Kwita ku burere bwabo.

Ni mu gitaramo uyu muramyi  yatumiyemo abaramyi bafite amazina akomeye mu Karere ka Afurika y’Iburasirazuba.

Muri abo barimo Apôtre Apollinaire, Nduwimana David, Aime Uwimana,Nkomezi Prosper.

Dusabe wihariye umwanya munini, yaririmbye indirimbo zakunzwe cyane zirimo umuyoboro, Umukunzi, n’izindi zakunzwe mu bihe byashize.

Uyu mugabo w’umugore n’abana batanu, yabanje gushimangira ko we n’umuryango we bazakorera Uwiteka.

Ati” Njye nab’uwiteka yampaye tuzakorera Uwiteka.”

Muri iki gitaramo, abana bo mu Kigo SOS village, bahawe umwanya muto, maze bibutsa ababyeyi ko badakwiye kwibagirwa inshingano zo kurera.

Bati” Erega babyeyi kuturera mukatwigisha amashuri, tukaminuza za Kaminuza nta burere ntacyo byatumarira.”

Bibukije  abana kandi kumvira impanuro z’ababeyi.

Bati” Twirinde kujya ku muhanda kuko nta cyiza kibamo.”

Aba bana basabye by’umwihariko ababyeyi kwirinda amakimbirane mu miryango atuma bisanga mu mihanda.

Muri iki gitaramo Umuramyi Alexis Dusabe yashimiye buri umwe watumye iki gitaramo cyiba.

Igitaramo cy’umunezero…

Ku isaha ya saa kumi n’imwe (17h00), Chorale yo muri ADEPR, Nyarugenge, yabanjirije abandi baririmbyi, maze baririmba indirimbo zikunzwe mu nsengero ziganjemo iz’umuhanzi w’umurundi Dudu T Niyukuri, iz’igifaransa n’icyongereza zifashishwa mu kuramya no guhimbaza Imana.

Alexis Dusabe ku isaha ya saa moya n’iminota ibiri (19h:02) yagiye ku rubyiniro nyuma y’umushyushyarugamba DjSpin.

Uyu muramyi wigaruriye imitima y’abakunda indirimbo zihimbaza Imana, yongeye kuririmba indirimbo ze zakunzwe cyane, ava ku rubyiniro abantu bacyimunezerewe.

Muri iki gitaramo umuhanzi Prosper Nkomezi yongeye kugaragaza ko ari umwe mu bakunzwe maze ahagurutsa abari bateraniye mu ihema rya Camp Kigali.

Uyu yaje Kwakira Aime Uwimana, maze  baririmba indirimbo ye ikunzwe, “Muririmbire Uwiteka” indirimbo yakunzwe cyane mu bihe bitandukanye ndetse n’izindi.

David Nduwimana wo muri Australia wagiye ku rubyiniro abanza gushimira abamufashije mu rugendo rwo kuba umuramyi barimo Apotre Apollonaire.

Mu bandi yashimiye barimo Aime Uwimanan, Alexis Dusabe, Gaby Kamanzi n’abandi.

Uyu yabanje kuririmba indirimbo yo mu rurimi rw’icyongereza , afatanya n’abitabiriye iki gitaramo.

Nduwimana yaje kuririmba indirimbo ze zitandukanye zishimiwe n’abatari bacye.

Apotre Apollinaire yegereje abantu IMANA…

Ku isaha ya saa yine n’iminota cumi n’itanu, (22H :15), Alexis Dusabe yahaye ikaze umuramyi Apôtre Apollinaire, abanza gushimangira ko ari umwe mu bamaze igihe mu muziki wo guhimbaza Imana.

Apollinaire wari kumwe n’itsinda ry’abaramyi batandatu bava iBurundi mu itsinda rya Shemeza Ministry, yasendereje umunezero abari buzuye ihema rya Camp Kigali.

Apotre Habonimana yaririmbye indirimbo ze zakunzwe zitandukanye mu bihe bitandukanye zirimo ” Mbega ubuntu “, n’izindi zitandukanye , maze yishimirwa n’abatari bacye.

Apotre Apollinaire Habonimana witabiriye iki gitaramo ndetse akaza kwishimirwa n’abatari bacye, ari mu baramyi b’ibihe byose mu Karere ka Afurika y’Iburasirazuba .

Uyu muramyi aheruka gutangaza ko yitegura gushinga mu Rwanda ishuri ryigisha kuramya no guhimbaza Imana.

TUYISHIMIRE RAYMOND/UMUSEKW.RW