Mbere y’uko shampiyona y’Icyiciro cya mbere ya Volleyball mu Bagore itangira, ikipe ya Rwanda Révenue Authority itozwa na Mutabazi Elie, irimbanyije imyitozo ndetse ihamya ko izatanga akazi muri uyu mwaka w’imikino 2024-25.
Iyi kipe y’Ikigo cy’Igihugu cy’Imisoro n’Amahoro (RRA WVC), irimbanyije imyitozo yitegura umwaka mushya w’imikino 2024-25. Ni imyitozo ibera mu nzu y’Imikino n’Imyidagaduro ya Kimisagara (Kimisagara Gymnasium).
RRA izakina shampiyona y’uyu mwaka, idafite uwari kapiteni wa yo wari uyimazemo imyaka hafi itanu, Gaoleseletse Gasekgonwe, bivugwa ko ashobora kuzakinira APR WVC.
Abarimo umutoza mukuru w’iyi kipe, Mutabazi Elie na Nzamukosha Olive wagizwe kapiteni, bahamya ko ikipe ya bo uyu mwaka izaba iri mu bakandida bo kwegukana igikombe cya shampiyona.
Biteganyijwe ko shampiyona y’uyu mwaka, izatangira tariki ya 18 Ukwakira 2024. Mu mwaka ushize w’imikino 2023-24, RRA WVC yasoje shampiyona iri ku mwanya wa Gatatu nyuma ya APR WVC yegukanye igikombe na Police WVC yabaye iya Kabiri.
UMUSEKE.RW