Iturika rya Gaz muri resitora i Yinchuan mu majyaruguguru y’uburengerazuba y’Ubushinwa ryahitanye abantu 31 mu gihe abagera kuri barindwi bakomeretse bakaba bari kwitabwaho n’abaganga.
Mu ma saha y’ijoro ryo kuri uyu wa Gatatu, nibwo iyi gaz yari muri restaurant yaturitse abari mu byishimo by’ibirori bizwi nka “Dragon Boat Festival” bakwira imishwaro abandi bahasiga ubuzima.
Abiganjemo abanyeshuri bo mu mashuri yisumbuye ndetse n’abari mu kiruhuko cy’izabukuru bari mu bapfuye nk’uko ibitangazamakuru byo muri kiriya gihugu bibivuga.
Ibiro ntaramakuru bya Xinhua byatangaje ko umubare w’abahitanye n’iri turika ushobora kwiyongera kuko hari abakomeretse bikomeye ndetse n’umwe urembye cyane.
Perezida w’Ubushinwa, Xi Jinping yasabye ko hashyirwa imbaraga nyinshi mu kuvura inkomere no kongera ingamba z’umutekano.
Yagize ati “Tugomba gukora ibishoboka byose kugira ngo dukize abakomeretse kandi twizeza imiryango y’abapfuye ko tumenya icyateye iyi mpanuka vuba.”
Resitora ririya turika ryabereyemo isanzwe iri ahantu ho kwidagadurira mu Mujyi wa Yichuan, umurwa Mukuru w’Akarere ka Yinchuan.
Iperereza ryibanze ryakozwe n’ishami rishinzwe kuzimya umuriro rigaragaza ko umukozi wo muri resitora yumvise umunuko wa Gaz yamenetse isaha mbere y’uko haba ririya turika.
Kugeza ubu abantu icyenda barimo nyiri resitora batawe muri yombi mu gihe iperereza ku cyateye iri turika rigikomeje.
- Advertisement -
MURERWA DIANE / UMUSEKE.RW
