Abahagarariye u Rwanda na Botswana, bahuriye mu nama y’ishoramari, igamije kurebera hamwe uko babyaza umusaruro amahirwe y’Isoko Rusange rya Afurika, AfCFTA .
Aba bahuriye mu Ihuriro ry’Ubucuruzi’ Botswana–Rwanda Business Forum’ ryatangiye ku wa 5-6 Gicurasi 2026, riri kubera i Gaborone muri Botswana.
Ku ruhande rw’u Rwanda iyi nama yitabiriwe n’abarimo umuyobozi Mukuru Wungirije w’Urwego Rushinzwe Iterambere mu Rwanda (RDB), Juliana Muganza ndetse na Minisitiri w’Ubucuruzi n’Inganda, Prudence Sebahizi aho impande zombi zaganiriye k’Ubucuruzi bw’amabuye y’agaciro, ubukerarugendo, ishoramari, n’ikoranabuhanga.
Minisitiri w’Ubucuruzi n’Inganda, Prudence Sebahizi, yagaragaje ko u Rwanda rwiyemeje koroshya ubucuruzi bwo muri Afurika binyuze mu masezerano y’Isoko rusange rya Afurika. AfCFTA.
Minisitiri Sebahizi yagize ati “ Twiyemeje guteza imbere ubucuruzi bukorwa hagati y’ibihugu bya Afurika binyuze mu masezerano y’Isoko Rusange rya Afurika AfCFTA, gushakira hamwe amahirwe mu nzego zihindura ubuzima bw’abaturage, ndetse no kubaka ikizere cy’ishoramari kugira ngo inzego zacu z’abikorera zishobore gukorana.”
Minisitiri Sebahizi yagaragaje u Rwanda nk’ahantu ho gushora imari, asaba abikorera bo muri Botswana kubyaza ayo mahirwe.
Yakomeje ati “ Ku bikorera bo muri Botswana batarabona u Rwanda nk’ahantu ho gushora imari, nimumpe umwanya mbivuge mu buryo burambuye. U Rwanda rurafunguye, rwiteguye kugirana bufatanye ubwo ari bwo bwose. Ibiganiro n’ingamba zifatwa uyu munsi bigomba kuvamo amasezerano afatika.”
Iyi nama ibaye mu gihe kuri uyu wa Gatatu tariki 6 Gicurasi 2026 Perezida Kagame ajya muri Botswana mu ruzinduko rw’akazi.
Byitezwe ko abakuru b’ibihugu byombi bagirana ibiganiro bigaruka ku bucuruzi bukorwa hifashishijwe ikoranabuhanga, ku bukerarugendo, ku bijyanye n’inkingo z’amatungo, gutwara abantu, ubufatanye mu kongerera agaciro amabuye y’agaciro ya diamant n’ibindi.
Itangazo rya Guverinoma ya Botswana rivuga ko Perezida Kagame azasura Ikigo gicuruza Diamant cya Botswana, Diamond Trading Company Botswana (DTCB).
Hazasinywa kandi amasezerano atandukanye arimo ubufatanye mu bucuruzi n’ishoramari, agena imikorere hagati y’Urwego rushinzwe Ishoramari n’Ubucuruzi muri Botswana, BITC n’Urwego rushinzwe Iterambere rw’u Rwanda, RDB.
Kuri ubu ibihugu bya Afurika biteze amakiriro kuri gahunda yo gucuruzanya hagati yabyo binyuze mu Isoko Rusange rya Afurika (African Continental Free Trade Area: AFCFTA) iganisha ku kugira “Afurika ihuriweho, iteye imbere kandi ifite amahoro” nk’uko biri mu cyerekezo 2063.
AFCFTA ni ryo soko ryagutse ku isi rihuza ibihugu 54 byo mu Muryango wa Afurika Yunze Ubumwe n’indi miryango y’ubukungu mu turere igera ku munani.
Ni umwe mu mishinga minini y’icyerekezo 2063 watangijwe n’Umuryango wa Afurika Yunze Ubumwe mu ngamba zo guhindura umugabane kuba uwishoboye mu ruhando mpuzamahanga binyuze mu gukuraho imbogamizi zibangamiye ubucuruzi imbere muri Afurika.
By’umwihariko ikigamijwe ni uguteza imbere ubucuruzi habanje kongerera umusaruro agaciro mu nzego zitandukanye z’ubukungu, ishoramari rigashinga imizi bikajyana no guhanga imirimo myinshi.
Hagombaga gufungura ubucuruzi bw’ibintu, ubwa serivisi no gushyiraho ingamba zo gukemura amakimbirane mu bucuruzi.
Mu kindi cyiciro harimo ishoramari, kugena iby’uburenganzira ku mutungo mu by’ubwenge, politiki y’ihiganwa, ubucuruzi bukoresha ikoranabuhanga, guteza imbere abagore n’urubyiruko.
UMUSEKE.RW
