Ibifashijwemo na kapiteni wayo, Agnes Nabukenya, Kawembe Muslims Ladies yo muri Uganda, yegukanye igikombe cya CAF Women’s Champions League CECAFA Qualifiers 2026, ihita ikatisha yo kuzakina CAF Women’s Champions League 2026.
Imikino isoza iri rushanwa, yabaye ku wa mbere, tariki ya 31 Kanama 2026 kuri Kigali Pelé Stadium.
Umukino wa nyuma, wayobowe n’umunya-Sudani y’Epfo wari hagati mu kibuga, umusifuzi wa Kane yari Umunyarwandakazi, Umutoni Aline mu gihe Komiseri wawo yari Uwimana Clarisse.
Kawembe Muslims Ladies yaje muri iri rushanwa atari benshi bayiha amahirwe, cyane ko ari ikipe igizwe n’abanyeshuri bo mu Kigo cya Kawembe Muslims Ladies giherereye i Kampala muri Uganda.
Kenya Police Bullets FC yo muri Kenya, nayo yatangiye neza itungura Simba Queens yo muri Tanzania, ariko amahirwe ntiyari ku ruhande rwayo.
Iminota 90 y’umukino, yarangiye Kawembe na Kenya Police Bullets zinganya 0-0, bituma hitabazwa iminota 30 y’inyongera.
Ku munota wa 100, ni bwo Agnes Nabukenya yaboneye abanya-Uganda igitego nyuma y’ikosa ryari rihanwe na Shadia Nabirye maze ba myugariro ntibabasha gukuraho umupira.
Kuva ubwo, abana bo muri Uganda bakomeje gucunga igitego cyabo, iminota 120 irangira bakoze amateka yo kwegukana iki Gikombe ku nshuro yabo ya mbere bageze ku mukino wa nyuma.
CBE FC yo muri Éthiopie, ni yo yegukanye umwanya wa Gatatu nyuma yo gutsinda Yei Joint Stars yo muri Sudani y’Epfo ibitego 6-1.
Emush Daniel Dandamo wa CBE FC, ni we watsinze ibitego byinshi (6), Saidah Namwanje wa Kawembe Muslims Ladies ni we wabaye umunyezamu mwiza w’irushanwa mu gihe Agnes Nabukenya w’iyi kipe ari we wabaye umukinnyi mwiza w’irushanwa (MVP).
Yei Joint Stars, ni yo yahembwe nk’ikipe yoroheye izindi (Fair-Play) n’ubwo igihembo cyayo nta wagifashe kuko yari yasohotse muri Stade.
Bivuze ko Kawembe ari yo izahagararira Akarere ka CECAFA mu irushanwa rya CAF Women’s Champions League rizakinwa mu Ukwakira 2026.
UMUSEKE.RW
