Nyuma yo kwegukana igikombe cya Shampiyona yo muri Arabie Saoudité, Cristiano Ronaldo yakoze amateka yo kwegukana igikombe ku Mugabane wa Aziya nyuma yo kubyegukana ku Mugabane w’u Burayi.
Ni ku nshuro ya mbere Cristiano Ronaldo yegukanye Igikombe cya Shampiyona ya Arabie Saoudité nyuma y’uko Al Nassr akinira yatsinze Damac ibitego 4-1 igahita yuzuza amanota 86 irusha amanota abiri Al Hilal SC yatsinze Al Feiha igitego 1-0.
CR7 yavuye mu Bwongereza mu 2022 ahitamo kwerekeza muri Al Nassr yo muri Saudi Pro League.
Uyu munyabigwi yahesheje iyi kipe igikombe cya Shampiyona yaherukaga mu mwaka w’imikino wa 2018/19.
Cristiano akigera muri Arabie Saoudité, ntabwo byamukundiye ko ahota yegukana iki gikombe, ndetse yakunze kumvikana kenshi atangaza ko ari Shampiyona ikomeye kurusha aho yari yaranyuze i Burayi mu Bwongereza no muri Espagne n’iwabo muri Portugal.
Kiyongereye ku kindi gikombe yatwaye ni icya Arab Club Champions Cup yatwaye mu 2023.
Akagozi kacitse mu ijoro ryo ku wa Kane, tariki ya 21 Gicurasi 2026, ubwo CR7 yakuragaho aya mateka mabi ubwo bakinaga na Damac bakayitsinda ibitego 4-1, mu mukino w’Umunsi 34 wa Saudi Pro League.
Iyi kipe yatsindiwe na Sadio Mané wagishyizemo ku munota wa 33, Kingsley Coman ku munota wa 51, na bibiri bya Cristiano Ronaldo ku munota wa 62 n’uwa 80.
Gutsinda uyu mukino byatumye yuzuza amanota 86, irusha amanota abiri Al Hilal SC bihanganye, n’ubwo na yo yari yatsinze Al Feiha igitego 1-0, ihita yegukana Igikombe cya 10 cya Shampiyona ya Arabie Saoudité, kiba icya 10 iyi kipe yegukanye [1975, 1980, 1981, 1989, 1994, 1995, 2014, 2015, 2019, 2026].
Muri uyu mwaka w’imikino, Al Nassr yatsinze imikino 28, inganya ibiri mu gihe yatsinzwe ine. CR7 yatsinze ibitego 28 muri 63 iyi kipe yinjije muri uyu mwaka wose.
Ibi byatumye uyu mukinnyi agira ibitego 973, mu rugendo rwe rwo kwandika amateka yo gutsinda ibitego 1000. Muri Saudi Pro League amaze gutsinda ibitego 102, mu gihe Al Nassr yayitsindiye ibitego 129.
Uyu munyabigwi yanditse andi mateka yo kwegukana Igikombe cya Shampiyona ku Mugabane wa Aziya nyuma yo kubyegukana iwabo, mu Bwongereza, muri Espagne no mu Butaliyani.
Cristiano ufite imyaka 41 ari ku rutonde rw’ikipe y’Igihugu ya Portugal izakina Igikombe cy’Isi cya 2026, kikazaba ari icya gatandatu akinnye mu mateka ye.
Uyu mukinnyi wegukanye Ballon D’Or eshanu yegukanye shampiyona eshanu z’aho yanyuze hose mu mupira w’amaguru. Yegukanye Shampiyona y’u Bwongereza inshuro eshatu ari kumwe na Manchester United, iya Espagne inshuro ebyiri ari kumwe na Real Madrid, iy’u Butaliyani inshuro ebyiri ari kumwe na Juventus.
UMUSEKE.RW
