Igisirikare cya Amerika cyongeye kugaba ibitero kuri Iran byibasiye ikigo cya gisirikare kiri i Bandar Abbas, umujyi w’ingenzi uturiye icyambu, ni igitero cya kabiri mu gihe kitageze ku minsi itatu.
Ubuyobozi bukuru bw’ingabo za Amerika muri Aziya (Centcom) bwatangaje ko ingabo zabwo zanahanuye drones enye za Iran zari zoherejwe kugaba ibitero ku buryo bwo kwiyahura (bazita kamikaze). Amerika izihanura kuko zari zibangamiye umutekano mu muhora wa Hormuz”.
Centcom yavuze ko icyo kigo cy’i Bandar Abbas cyagabweho igitero mu gihe cyari kigiye kohereza drone ya gatanu.
Ibinyamakuru byo muri Iran byatangaje ko humvikanye ibiturika mu Burasirazuba bw’uwo mujyi.
Ibi bitero bibaye mu gihe agahenge k’intambara kari kamaze iminsi hagati y’impande zombi kadahagaze neza, hakaba hakomeje ibiganiro byo kurangiza intambara imaze amezi atatu, yatumye urujya n’uruza rw’ubwato mu muhora wa Hormuz rukomwa mu nkokora.
Byatumye ibiciro by’ibikomoka kuri petelori bizamuka kurushaho isi isigara mu kangaratete.
Ni ubwa kabiri mu minsi itatu Amerika igabye ibitero muri Iran, ikavuga ko ibyo bitero byakozwe mu rwego rwo kwirwanaho, gusa ibi bishobora gutuma intambara ifata indi ntera mu gihe amahanga yakekaga ko ibintu bigiye kongera kuba byiza kurushaho.
Ibiro biyobora ingabo za Amerika muri Aziya, Centcom byavuze ko ibikorwa byayo “byapimwe neza kandi byari ibyo kwirwanaho gusa bityo ko agahenge kagikomeje.”
Ku wa Mbere w’iki cyumweru, byari byemeje ko byagabye mu Majyepfo ibindi bitero byo “kwirwanaho” byibasiye ibirindiro bya missiles za Iran n’ubwato bwashakaga gushyira ibisasu byo mu mazi y’umuhora wa Hormuz.
Iran yamaganye ibyo bitero, ivuga ko ari “ukwica agahenge”, kandi isezeranya ko “ubutegetsi bwa Iran butazarera amaboko ngo burebere ibyo bikorwa by’ubugizi bwa nabi, hanyuma ntibisubizwe.”
Ingabo zidasanzwe za Iran zizwi nka Islamic Revolutionary Guard Corps (IRGC) na zo zatangaje ku wa Kabiri ko zahanuye drone ya Amerika kandi zirasa indege y’intambara ndetse n’indi zombi zinjiye mu kirere cya Iran, ariko ntizatangaje igihe ibyo byabereye.
Mu nama y’Abaminisitiri ku wa Gatatu, Perezida wa Amerika Donald Trump yavuze ko Iran “iri kuganira isa n’iyacitse intege”, ashimangira ko gahunda ye y’intambara itazahungabanywa n’amatora ya Amerika ateganyijwe mu Ugushyingo, 2026.
Ati: “Birashoboka ko tugomba gusubirayo tukarangiza akazi, cyangwa se ntitubikore.”
Muri iyo nama kandi, Perezida Trump yasabye ibihugu byo mu karere ka Gulf gushyigikira amasezerano ya Abraham Accords agamije kunoza umubano na Israel.
Israel yatangije intambara kuri Iran ifatanyije na Amerika ku wa 28 Gashyantare, kandi yanashyamiranye n’umutwe wa Hezbollah ushyigikiwe na Iran muri Lebanon.
Mu gihe ari uko bimeze, Perezida Trump yavuze ko ashobora kongera gutangiza ibitero bikomeye byo mu kirere niba Iran niba itemeye ibyo Amerika isaba.
Ndetse ngo Amerika ntiranyurwa n’uko amasezerano igihugu cye kiri kugirana na Iran ari kugenda, akabivuga mu gihe Iran iyo ivuga ko ibitero Amerika igaba ari ukubangamira bikomeye imigendekere y’agahenge kari karemejwe kugeza ubu.
Nubwo Trump yari yavuze mu mpera z’icyumweru gishize ko amasezerano y’amahoro na Iran “yari hafi kurangira agasinywe”, mu nama y’Abaminisitiri yo ku wa Gatatu yavuze ko Amerika “itaranyurwa”.
Yavuze ko Tehran “ifite ubushake bwinshi” bwo kugera ku masezerano yo guhagarika intambara, ariko yongeraho ati: “Kugeza ubu ntibarabigeraho”, asubiramo ko Amerika yiteguye kongera kugaba ibitero niba ayo masezerano atagerwaho.
Ibi yabivuze nyuma y’uko televiziyo ya Leta ya Iran itangaje ibyo yavuze ko ari ibyari bikubiye mu masezerano yategurwaga, harimo kongera gufungura umuhora wa Hormuz no gukura ingabo za Amerika muri ako karere.
Perezidansi ya Amerika yanyomoje ibyo, ivuga ko ari ibinyoma ‘byambaye ubusa.’
Impande zombi zari zagaragaje ko hari intambwe yatewe mu biganiro ku masezerano mu mpera z’icyumweru gishize, bituma havugwa ko hari itangazo ryari hafi gusohoka.
Umunyamabanga wa Amerika ushinzwe ububanyi n’amahanga Marco Rubio nawe yabitangarije abanyamakuru ubwo yari agannye mu Buhinde, avuga ko kuri uyu wa Mbere ari bwo iryo tangazo ryagombaga gusohoka.
Ariko Tehran yahise ivuga ko ayo masezerano “ataragera ahantu wakwizera ko agiye gusinywa”, naho Trump we yari yabwiye abari mu biganiro “kutihutira” kuyasinya.
UMUSEKE.RW
