Ishyirahamwe ry’Umupira w’Amaguru ku Isi [FIFA] ifatanyije n’urubuga rwa YouTube, bashyizeho uburyo bworohereza abakunda ruhago bifuza kuzakurikira Igikombe cy’Isi 2026.
Izi mpande zombi zashyizeho uburyo bufasha abifuza kuzareba irushanwa ry’Igikombe cy’Isi cy’uyu mwaka.
Bumwe muri butanu bwashyizweho, Televiziyo zaguze uburenganzira bwo kwerekana imikino y’Igikombe cy’Isi cya 2026 zizaba zifite uburenganzira bwo kwerekana imikino mu buryo bwa ‘Live’ iminota 10 ya mbere y’umukino ndetse zemerewe no guhitamo imwe mu mikino zizanyuzaho iminota 90 yose, binyuze ku mirongo ya YouTube y’izo televiziyo.
Ariko ibi bizaterwa n’ahantu umuntu aherereye kuko bizajya bikora hashingiwe ku bice izi Televiziyo zitagomba kurenza zerekana amashusho y’ako kanya [Live] y’Igikombe cy’Isi cya 2026.
Hari kandi kuzajya herekana ibihe by’ingenzi byaranze umukino ‘Highlights’. Mu gihe uwaba yacikanywe n’umukino, uzajya ureba ibihe by’ingenzi byawuranze wifashishije umuyoboro wa YouTube ya FIFA.
Ahazajya hatambutswa ubusesenguzi ndetse n’ibihe by’ingenzi byaranze buri mukino wose mu mikino yose uko ari 104 izaba muri iki Gikombe cy’Isi.
Hazabaho kureba ibibera inyuma y’amarido abareba imikino baba batabonye ‘Behind the scenes’.
Urubuga rwa YouTube, rwatangaje ko ruzaba rukorana n’abakoresha imbuga nkoranyambaga [Content creators] bakurikirwa cyane kuri uru rubuga, bazaba bemerewe kuzajya bajya hasi ku kibuga [Pitch Erea] ndetse n’ahandi hose muri za sitade kugira ngo basangize ababakurikira amashusho atigeze agaragara kuri za televiziyo. Bamwe muri aba bakoresha izi mbuga nkoranyambuga, bazakorana na FIFA na YouTube, barimo Celine Dept, Aya Y Fer, Jeenie Weenie, n’abandi bafite amazina ku mbuga nkoranyambuga.
Abafana bahawe uburenganzira bubemerera kuzajya bakoresha amashusho y’Igikombe cy’Isi barema ayabo.
Abakunzi ba ruhago bazaba bemerewe kuba bafata amwe mu mashusho y’iri rushanwa ry’uyu mwaka yashyizwe ku rubuga rwa FIFA, bakaba bayasubiramo bagakora andi mato azwi nka ‘Shorts’ kuri YouTube.
Hari ndetse kureba ibyahise ‘Archive’ abakoresha YouTube bazaba bafite uburenganzira bwo kureba amashusho yo mu Bikombe by’Isi byatambutse aho yashyizwe ku muyoboro wa YouTube wa FIFA.
Ibi byose byakozwe n’urwego ruyobora Ruhago ku Isi, kugira ngo abakunzi ba ruhago hirya no hino babashe kuryoherwa kandi ntibazacikwe.
UMUSEKE.RW
