Ubutegetsi muri Repubulika Iharanira Demokarasi ya Congo (RDC) bwatangaje ko ibikorwa bihuza abantu benshi bihagaritswe mu mijyi irimo Kinshasa, mu rwego rwo gukumira ikwirakwira ry’icyorezo cya Ebola.
Abatavuga rumwe n’ubutegetsi bavuze ko Perezida Antoine Felix Tshisekedi ashaka gukoresha Ebola nk’intwaro ya politiki agaharika imyigaragambyo yateguwe.
Jacquemain Shabani, Minisitiri w’Umutekano, yavuze ko ibikorwa birimo imyigaragambyo, inama z’amashyaka ya politiki n’ibindi byahuriza hamwe abantu benshi bihagaritswe i Kinshasa, ndetse no mu Ntara za Tshopo, Haut-Uele na Bas-Uele.
Nubwo Leta yavuze ko guca amahuriro y’abantu biri mu rwego rwo gukumira ikwirakwira rya Ebola ubu imaze kwica abantu 360 mu barenga 1,200 bayanduye by’umwihariko mu Ntara ya Ituri, amashyaka atavuga rumwe n’ubutegetsi buriho yo yabyise gushaka kubacecekesha hitwajwe Ebola.
Prince Epenge uvugira Ihuriro ry’amashyaka rya Lamuka yavuze ko Leta n’ishyaka UDPS rya Perezida Felix Tshisekedi bashyizeho ayo mabwiriza kugira ngo babangamire imyigaragambyo iteganyijwe tariki ya 8 Nyakanga, 2026.
Iyi myigaragambyo yateguwe n’Ihuriro 64’ ribamo abanyapolitike bavuga ko biyemeje gukora ibishoboka ngo barengere itegeko nshinga, Perezida Tshisekedi ntazongera kwiyamamariza indi manda mu matora y’Umukuru w’Igihugu ateganyijwe mu 2028.
MUGIRANEZA THIERRY/ UMUSEKE.RW
