Abahagarariye Ingabo za Repubulika Iharanira Demokarasi ya Congo (FARDC) bahuriye i Goma n’abahagarariye ihuriro AFC/M23 mu nama ya mbere igamije gutangiza ku mugaragaro ibikorwa by’Urwego Ruhuriweho rushinzwe kugenzura no gukurikirana iyubahirizwa ry’agahenge, mu gihe impande zombi zigikomeje gushinjanya kurenga ku masezerano yasinywe.
Iyi nama yabaye kuri uyu wa Kane, tariki ya 16 Nyakanga 2026, yitabiriwe kandi n’indorerezi z’Umuryango wa Afurika Yunze Ubumwe (AU) hamwe n’iz’ubutumwa bw’Umuryango w’Abibumbye bwo kubungabunga amahoro muri RDC (MONUSCO).
Yabereye ku cyicaro cy’Urwego Rushinzwe Kugenzura no Gukurikirana Iyubahirizwa ry’Agahenge (COVM) ndetse n’Urwego Ruhuriweho rwagutse rw’Igenzura (MCVE+).
Ku ruhande rwa FARDC, abitabiriye iyi nama barimo Lt. Col. Ben Epule Cosmas, Maj. Lokuli Bofanda Fredy na Maj. Kitoko Dimonekene André. Aba bofisiye bageze i Goma ku wa 13 Nyakanga 2026, bazanywe n’indege ya MONUSCO bari kumwe n’Intumwa Yihariye yungirije y’Umunyamabanga Mukuru wa Loni akaba n’Umuyobozi Wungirije wa MONUSCO, Vivian van de Perre.
Urwego rwa MCVE+ rwashyizweho hashingiwe ku masezerano y’agahenge yasinyiwe i Doha muri Qatar ku wa 14 Ukwakira 2025 hagati ya Guverinoma ya RDC na AFC/M23.
Aya masezerano yari agamije guhagarika imirwano no gutangiza inzira ya politiki yo gushaka amahoro arambye mu Burasirazuba bwa Repubulika Iharanira Demokarasi ya Congo.
Nyuma y’ayo masezerano, muri Mata 2026 i Montreux mu Busuwisi habereye ibiganiro, aho impande zombi zemeranyije ku mikorere y’uru rwego, inshingano zarwo n’uburyo ruzajya rusesengura uko agahenge kubahirizwa na buri ruhande.
Mu nshingano z’uru rwego harimo kwakira no gusesengura amakuru atangwa n’impande zombi, gukora iperereza ku birego byo kutubahiriza agahenge, gutegura raporo zishyikirizwa abafatanyabikorwa b’ibiganiro by’amahoro no gufasha gukemura amakimbirane mbere y’uko akomera.
Hashingiwe kuri ayo masezerano, RDC igomba kugira abayihagarariye batatu muri MCVE+, AFC/M23 na yo ikagira batatu, mu gihe abandi bagize uru rwego bazaturuka mu nzego mpuzamahanga.
MONUSCO izatanga ubufasha bw’ibikoresho n’ubwa tekiniki, burimo gutwara abagize uru rwego mu bice bagomba gukoreramo iperereza, ndetse no gukoresha drones mu kugenzura iyubahirizwa ry’agahenge.
Nubwo MCVE+ itangiye ibikorwa byaryo ku mugaragaro, Guverinoma ya Kinshasa na AFC/M23 bamaze iminsi bashinjanya kugaba ibitero bishya no kurenga ku masezerano y’agahenge, by’umwihariko mu bice bitandukanye byo mu Ntara ya Kivu y’Amajyepfo.
MUGIRANEZA THIERRY/ UMUSEKE.RW
