Perezida wa Leta Zunze Ubumwe za Amerika, Donald Trump, yongeye gushinja u Bushinwa kwivanga mu matora ya Perezida yo mu 2020 yatsinzwemo na Joe Biden, nubwo inzego z’ubutasi za Amerika zikomeza kuvuga ko ibyo birego bidafitiwe ibimenyetso bifatika.
Mu ijambo ryamaze hafi iminota 30 yabwiye Abanyamerika kuri televiziyo ku wa Kane, tariki ya 16 Nyakanga 2026, ari muri White House, Trump yavuze ko yashyize ahagaragara amadosiye yahoze ari ibanga y’inzego z’ubutasi, avuga ko agaragaza uko u Bushinwa bwagerageje kugira uruhare mu gutuma Joe Biden atsinda amatora yo mu 2020.
Trump yavuze ko ayo madosiye agaragaza ko u Bushinwa bwabonye mu buryo bunyuranyije n’amategeko amakuru bwite y’abiyandikishije gutora arenga miliyoni 220, ndetse ko amakuru y’abatora bo muri Leta 18 “yaguzwe, yibwe cyangwa yinjiriwe mu buryo bwa mudasobwa.”
Yashinje kandi bamwe mu bayobozi kuba baramenye ayo makuru ariko ntibayatangarize ubuyobozi bwa Leta cyangwa Inteko Ishinga Amategeko.
Yagize ati “Amakuru y’abatora bo muri Leta 18 yaguzwe, yibwe cyangwa yinjiriwe mu buryo bwa mudasobwa n’u Bushinwa, ariko ababimenye ntibigeze babimenyesha inzego zibishinzwe.”
Kuva yatsindwa amatora yo mu 2020, Trump ntiyigeze yemera ibyatangajwe ko Joe Biden ari we wayatsinze. Nyuma y’ayo matora, bamwe mu bamushyigikiye bagabye igitero ku nyubako y’Inteko Ishinga Amategeko ya Amerika barayangiza .
Ibyo Trump avuga binyuranye na raporo yasohowe mu 2021 n’Inama Nkuru y’Ubutasi ya Amerika, yavuze ko yizeye idashidikanya ko u Bushinwa butigeze bwivanga mu matora ya Perezida yo mu 2020.
Iyo raporo yagaragaje ko nubwo Beijing yaba yaratekereje ku buryo yashoboraga kugira uruhare mu matora, itigeze ifata icyemezo cyo kubikora kuko itabonaga inyungu zihagije zatuma ibikora.
Trump yanavuze ko uburyo Amerika ikoresha mu matora bukiri mu kaga, avuga ko imashini zikoreshwa mu matora “zifunguye cyane ku buryo zishobora kwinjirirwa” n’ibihugu bihanganye na Amerika birimo u Bushinwa, u Burusiya na Iran.
Yasabye kandi Inteko Ishinga Amategeko gutora itegeko rya ‘SAVE America Act’, riteganya gukaza amabwiriza agenga amatora, harimo gusaba abiyandikisha gutora kwerekana icyemezo cy’ubwenegihugu, indangamuntu iriho ifoto no kugabanya uburyo bwo gutora hakoreshejwe iposita.
Trump yavuze ibi mu gihe na we yakunze kwibutswa ko u Burusiya bwivanze mu matora yo mu 2016 yamugize Perezida.
MUGIRANEZA THIERRY/ UMUSEKE.RW
