Icyorezo cya Ebola cyo mu bwoko bwa Bundibugyo gikomeje gukaza umurego muri Repubulika Iharanira Demokarasi ya Congo (RDC), aho abantu 1,657 bamaze guhitanwa na cyo, mu gihe abanduye bageze ku 3,748, kugeza ku wa 1 Kanama 2026.
Minisiteri y’Ubuzima muri RDC ivuga ko Ebola imaze kugaragara mu ntara eshanu, ari zo Ituri, Kivu y’Amajyaruguru, Kivu y’Amajyepfo, Haut-Uélé na Tshopo.
Intara ya Ituri ni yo yibasiwe cyane n’iki cyorezo, kuko habarizwa abarenga 90% by’abanduye bose. Muri utu duce 36 tw’ubuzima tugize Ituri, 28 tumaze kugaragaramo Ebola.
Muri Kivu y’Amajyaruguru, iki cyorezo kimaze kugaragara mu duce 11 muri 34 tw’ubuzima tugize iyi ntara.
Inzego z’ubuzima muri RDC zitangaza ko igipimo cy’abahitanwa na Ebola kiri kuri 44.2%. Zivuga kandi ko zishobora gukurikirana 80.1% by’abantu bakekwaho kuba baranduye cyangwa abahuye n’abanduye, mu rwego rwo gukumira ikwirakwira ry’iki cyorezo.
Abashinzwe ubuzima bavuga ko umutekano muke mu bice byibasiwe, ubuke bw’abaganga n’ibikoresho bikenewe mu kuvura no gukumira Ebola, ndetse n’imyumvire ya bamwe mu baturage, bikomeje kuba imbogamizi zikomeye mu guhashya iki cyorezo.
Mu rwego rwo gushaka uburyo bwo guhangana n’iki cyorezo, Ishami ry’Umuryango w’Abibumbye ryita ku Buzima (OMS) riherutse gutangaza ko ryatangije igeragezwa rya mbere ry’umuti ugamije kurwanya virusi ya Ebola.
Iryo geragezwa rigamije kureba niba uwo muti ushobora gufasha mu kurwanya Ebola yo mu bwoko bwa Bundibugyo, imaze amezi yugarije RDC.
MUGIRANEZA THIERRY/UMUSEKE.RW
