Urubyiruko 90 rwo mu karere ka Burera rwari rwaracikirije amashuri kubera ubushobozi bucye rurishimira ko rwigishijwe umwuga ugiye kubahindurira ubuzima.
Ni nyuma yo nyuma yaho kuwa 15Kanama 2026, barangije amasomo y’umwuga mu ishuri Jabana Parentl VTC School ryo mu karere ka Gasabo mu Mujyi wa Kigali.
Ni amasomo bahawe mu gihe cy’amezi atandatu mu bijyanye no kwiga ubukanishi,gukora amashanyarazi,ubudozi, gukora ibijyanye n’iby’ubwiza, gutunganya ikawa
Uwurukundo Naphtari wo mu karere ka Burera, ashimangira ko nyuma yo gucikiriza amashuri kubera amikoro macye, akagarukira mu mwaka wa Gatandatu w’amashuri abanza, ubuyobozi bw’akarere ka Burera bwamufashije kubona ikigo kibigisha umwuga ubateza imbere.
Ati “Ubusuderi ni umwuga nize nkunze ,ni umwuga uzangiria akamaro . Ni ngera hanze, uzagira byinshi umfasha.Mu mezi atandatu nize hano, nize ibintu byinshi bishoboka, bizamfasha kwiteza imbere. Ubu nzi gukora inzugi n’amadirishya, n’ibindi bitandukanye.”
Umwari Rosine wo mu Murenge wa Kinyababa mu karere ka Burera, ashima uburyo leta yabashije kubona umwuga uzabafasha guhindura imibereho.
Ati “Hano nize ibijynaye no gutunganya umusatsi n’iby’ubwiza. Ubumenyi bwose barabuduhaye.Naje nta kintu nzi gukora ariko muri rusange ubu ibintu byose narabimenye. Ubu ngiye kujya hanze mbishyire mu bikorwa. Nzatunga umuryango wanjye maze nivane mu bukene.”
Umuyobozi w’Ishuri Jabana Parentl VTC School, Nsengiyumva Innocent,avuga ko iri shuri ritanga ubumenyi bufasha urubyiruko kwiteza imbere.
Ati “Ishuri ryacu ni ishuri ryigisha imyuga n’ubumenyi ngiro, twigisha igihe gito, urubyiruko rukajya gushaka ubuzima. Kandi dutewe ishema nuko dusohora abakozi bajya mu kazi kandi bagakora neza kinyamwuga .Niryo shema ryacu duharanira kugira ngo Umunyarwanda abeho ashoboye kandi ashobotse.”
Umuyobozi w’Akarere wungirije ushinzwe iterambere ry’ubukungu, NSHIMYIMANA Jean Baptiste, avuga bahisemo gukorana n’iri shuri ryo mu mujyi wa Kigali kwiga umwuga muri gahunda yo kuzamura imiryango ifite ubushobozi bucye ngo ibashe kwiteza imbere.
Ati “Akarere kabigizemo uruhare muri gahunda ya ‘Graduation’ aho akarere gafasha imiryango y’amikoro macye, muri iyo miryango harimo abashoboye gukora. Muri ya gahunda yo kuzamura iyo miryango,tubaha amahirwe yo kubigisha umwuga, muri iki kigo cya Jabana Parentl VTC School rero twoherejemo 90 ari nabo barangije.”
Akomeza agira ati “Icyo bivuze ni uko bazagira uruhare mu kuzamura imiryango yabo kandi nabwo ubwabo bakizamura.”
Visi Meya Nshimiyimana avuga ko nyuma yo gusoza amasomo , babahuriza hamwe mu makoperative kugira bibafasha kubahuza n’amabanki yabafasha kubona inguzanyo yo kwiteza imbere.
Visi Meya yongeraho ko aba 90 ari icyiciro cya Gatatu bafashije kwiga umwuga uzabakura mu bucyene no kubahindurira imibereho.
UMUSEKE.RW
